Dziaržava:
1. 19 lutaha ŭ Minsku adbyłasia pasiedžańnie kruhłaha stała «Rodnaja mova rodnaj ziamli». Siarod udzielnikaŭ — Alaksandar Łukašaniec, dyrektar instytutu movy i litaratury, paet i dyrektar zamiežnaha viaščańnia Biełaruskaha radyjo Navum Halpiarovič, daradca ministra adukacyi pa suviaziach z hramadskaściu Viktar Iŭčankaŭ. Padčas abmierkavańnia adzin z udzielnikaŭ, syn Jakuba Kołasa, navukoŭca Michaś Kanstancinavič Mickievič zaŭvažyŭ, što skasavańnie «haniebnaha zakona» ab dvuchmoŭi dazvolić źmianić nadzvyčaj ciažkuju situacyju ŭ krainie ź biełaruskaj movaj.
2. Niezadoŭha da dnia rodnaj movy dziaržaŭnaja telefonnaja kampanija «Biełtelekam» uviała novuju pasłuhu — prasłuchoŭvańnie kazak pa-biełarusku. Vy nabirajecie 196 z chatniaha telefona i słuchajecie ŭpadabanuju kazku. Košt — 73 rubli za chvilinu.
3. U navinach pieršaha kanału apošnim časam pavialičyłasia kolkaść repartažaŭ na biełaruskaj movie. Kali ŭžo niekalki hadoŭ na navinach pa-biełarusku išli paasobnyja pieradačy na temy kultury, dyk ciapier, try tydni paśla sustrečy staršyni TBM Aleha Trusava i kiraŭnika BT Alaksandra Zimoŭskaha, krychu abiełarušany haspadarča-hramadski błok. Adzin dzień u vypusku navinaŭ było ažno 4 repartažy pa-biełarusku.
Akademičnyja koły:
Ceły tydzień na fiłfaku BDU išli mierapryjemstvy, pryśviečanyja dniu rodnaj movy: sustrečy studentaŭ z movaznaŭcami, viečar pierakładaŭ, a taksama vystup choru vykładčykaŭ i studentaŭ «Natchnieńnie».
Hramadskaść:
Tavarystva Biełaruskaj Movy imia Franciška Skaryny ładzić užo druhuju ahulnabiełaruskuju dyktoŭku, što maje adbycca pa ŭsioj Biełarusi ŭ try etapy: 21 lutaha, 15 i 25 sakavika 2009 hoda. 21 lutaha dyktoŭku možna napisać na siadzibie tavarystva (Rumiancava, 13) a 11 i a 12 hadzinach. Na sajcie TBM padadzieny tekst dyktoŭki.
U dadatak 21 lutaha a 2-oj hadzinie TBM zaprašaje ŭ Pałac Mastactvaŭ (vuł.Kazłova, 3) na ŭračystaści, pryśviečanyja Mižnarodnamu dniu rodnaj movy. U prahramie: uhanaravańnie prapahandystaŭ biełaruskaj movy, prezientacyja hramadskich inicyjatyŭ (stvareńnie razmoŭnika) a taksama kancertnaja prahrama.
