Jak paviedamiŭ staršynia prafkamu Mienskaj haradskoj pieršasnaj arhanizacyi prafsajuzu radyjoelektronnaj pramysłovaści (REP) Uładzimir Łazoŭski,
pracoŭnych Mienskaha aŭtazavodu pačali papiaredžvać, što pradpryjemstva nie budzie pracavać z 1 da 8 sakavika.
«Majstry ŭžo papiaredžvajuć pracoŭnych, što z 1 da 8 sakavika zavod nie budzie pracavać naahuł. Tłumačycca hetaja miera tym, što pradukcyja MAZu nie realizujecca ŭ Rasiei i ŭ suviazi z hetym uźnikajuć prablemy z zabieśpiačeńniem materyjałami. Nieviadoma, što budzie paśla 8 sakavika. Doŭhaterminovyja abiacańni nichto davać nie choča. Ludziej prosta staviać pierad faktam – tydzień pracavać nie budziem», - paviedamiŭ Uładzimir Łazoŭski.
Prafsajuzny aktyvist nahadaŭ, što
MAZ užo niekalki tydniaŭ pracuje ŭ skaročanym režymie. Aŭtobusnaja vytvorčaść pracuje 4 dni ŭ tydzień, astatnija – 3 dni.
«Pracy niama, usie placoŭki zahružanyja aŭtamabilami. Vyrablać pradukcyju na skład – zamarožvać tyja niešmatlikija abarotnyja srodki, jakija jašče jość», - upeŭnieny Łazoŭski.
Pry hetym prafsajuzny lider adznačaje, što skaračeńnie pracoŭnaha tydnia i biez taho mocna adbiłasia na zarobku pracoŭnych. Vymušany poŭny prastoj skarocić zarpłaty jašče bolš.
«Adbyvajecca vialikaja strata zarpłaty. Za prastoj pracoŭnym płaciać 2/3 nie zarpłaty, a 2/3 taryfnaj staŭki, a taryfnaja staŭka ad zarpłaty składaje 35-40%. Čałaviek, sychodziačy na prastoj, atrymlivaje ŭ miežach 25-30% svajho zarobku. Voś i ličycie straty», - kaža Łazoŭski.
Pa słovach aktyvista, składanaja situacyja siońnia zachoŭvajecca na šmatlikich pradpryjemstvach Miensku.
«Taja ž «trochdzionka» na Mienskim padšypnikavym zavodzie i Mienskim zavodzie kołavych ciahačoŭ.Motaviełazavod nie raspačynaŭ pracu naahuł. Na Traktarnym zavodzie značna źnižany abjom vytvorčaści. Na Matornym zavodzie istotna źniziłasia zarpłata», -- adznačyŭ Łazoŭski.
