Suśvietnaja šachalimpijada ŭ Italii prajšła tamsama, dzie zimovyja alimpijskija hulni, adnak na try miesiacy paźniej. U Turynie adbylisia i pieravybary prezydenta FIDE – Kirsan Ilumžynaŭ zachavaŭ svaju pasadu. Ciapier mała chto pamiataje, što ŭ 1999 h. jon vysłaŭ pa nacyjanalnych federacyjach listy, paabiacaŭšy nieŭzabavie dabicca padvyšeńnia statusu šachmataŭ – šlacham ich ułučeńnia ŭ prahramu «ahulnych» alimpijskich hulniaŭ… Padobna, pravadyr kałmykaŭ budzie daryć abiacanki jašče kolki hod: eŭrabiznesoviec Beseł Kok pierajhrany im ź likam 96:54. Hołas Biełaruskaj federacyi šachmat taksama dastaŭsia Ilumžynavu.
Cikava, što nakonadni vybaraŭ u Miensk admysłova prylataŭ vice-prezydent FIDE Zurab Azmajparašvili – hrosmajstar, jakoha pabili na Alimpijadzie-2004. Nia viedajem, čym jon zavabiŭ tutejšych čynoŭnikaŭ, ale ŭ NAKu jaho prymali na vysokim uzroŭni, až da pamočnika prezydenta… Načalnik nacyjanalnych alimpijskich kamandaŭ pa šachmatach i šaškach Hieorhi Buhrym raskazaŭ nam, što ahitacyja išła i za supiernika Ilumžynava – «u federacyju navat telefanavali z tureckaj ambasady, prasili padtrymać «ich» kandydata». Vychodzić, Biełaruś dahetul maje nie aby-jakoje značeńnie na šachmatnaj mapie śvietu.
U kancy traŭnia ŭ Turyn pajechali i mužčyny, i žančyny – vypravu apošnich z Maskvy finansavaŭ pradprymalnik Kastuś Ivanoŭ, bo ŭ Minsportu nie znajšłosia hrošaj. Ale jakraz šachmatystki – Nadzieja Azarava, Taciana Berlin, Natalla Papova, Hanna Šarevič – vystupili fajna. Hanna, prykładam, uziała 9 bałaŭ z 12.
Mužčynskaj kamandzie, chiba ŭpieršyniu składzienaj tolki z hrosmajstraŭ, brakavała zhurtavanaści. Čaho dzivicca, kali Alaksiej Alaksandraŭ, pasadžany za pieršuju došku, u adnym interviju zajaviŭ, što «kamanda ŭ šachmatach – štučnaje ŭtvareńnie»! Užo ŭ pieršym tury jon ziaŭnuŭ fihuru małaviadomamu majstru z Valii.
Zatoje zorkaj hulniaŭ staŭ čempijon krainy Viačasłaŭ Dydyška, jaki filihranna zdužaŭ elitnaha rasiejskaha hrosa Jaŭhiena Barejeva. Nahadajem, što sp.Viačasłavu 57 hadoŭ, i jon spałučaje paśpiachovyja vystupy ŭ turnirach z navučańniem junych šachmatystaŭ u mienskaj spartškole №11.
Pieršyja miescy apanavanyja kamandami Armenii (mužčyny) i Ŭkrainy (žančyny). Biełarusy j biełaruski – na 36-m i 21-m. A «macaki» z BFŠ prahnazavali, što ŭsio budzie naadvarot…
VR
Jak by vy zhulali?
Mančao Ramera E. (Ekvador) – Šarevič H. (Biełaruś). Turyn, 2006. Chod čornych. Zdajecca, što za kania ŭ biełych niebiaśpiečnaja ataka.
Adkaz: spakojnaje 1…Fh8! dapamahło jaje adbić (2. Ch6 Cf6 3. Cf7+?! Tf7 4. Fg6+ Tg7).
