Lidery Eŭraźviazu ŭchvalili ŭviadzieńnie eŭra ŭ Słavienii z 1 studzienia 2007 hodu na samicie ŭ Bruseli. Takim čynam, Słavienija stanie pieršaj krainaj z novych siabraŭ EZ ad 2004 hodu, jakaja zmahła ŭvieści adzinuju valutu, pieradaje BBC News.
Krainie pad kiraŭnictvam Janeza Drnoŭšeka ŭdałosia vykanać usie nieabchodnyja krytery pa źnižeńni dziaržaŭnaj zapazyčanaści i deficycie biudžetu dla dałučeńnia da zony eŭra. Inflacyja ŭ krainie skłała ŭ 2005 hodzie 2,4 adsotka pry nieabchodnych 2,61 adsotka.
Ciapier zamienu słavienskich tołara i staciny na eŭra dy eŭracenty naležyć uchvalić ministram finansaŭ EZ. Im taksama nieabchodna ŭstalavać kančatkovy kurs abmienu słavienskaj i eŭrapiejskaj valuty. Čakajecca, što hetyja rašeńni ministry prymuć na pasiedžańni 11 lipienia, paviedamlaje ahienctva AFP.
Astatnija krainy, jakija pretendujuć na ŭvachodžańnie ŭ zonu eŭra, pakul nia mahuć vykanać kryter pa inflacyi. Čakajecca, što Estonija, Litva, Łatvija, Kipr i Malta piarojduć na eŭrapiejskuju valutu ŭ 2008 hodzie, u 2009 hodzie da zony eŭra dałučycca Słavakija, a ŭ 2010-m Čechija.
Nahadajem, što Słavienija stała niezaležnaj amal adnačasova ź Biełaruśsiu – 25 červienia 1991 hodu. Na hetym histaryčnyja paraleli zakančvajucca. Słavienija dałučyłasia da NATO 29 sakavika 2004 hodu, ustupiła ŭ Eŭraźviaz 1 traŭnia 2004 hodu. Ciapier pieršaja z novych siabraŭ EZ pierachodzić na eŭra.
