Siońnia na pasiedžańni Palityčnaj rady abjadnanych demakratyčnych siłaŭ abmierkavany plan supolnych dziejańniaŭ. Hety dakument raspracavała admysłovaja rabočaja hrupa, u jakuju ŭvachodzili pradstaŭniki subjektaŭ kaalicyi.
Plan palityčnaj kampanii «Za svabodu» składajecca z kankretnaha raskładu dziejańniaŭ. Pavodle lidera abjadnanaj apazycyi Alaksandra Milinkieviča, dakument zadavalniaje ŭsich, chacia pryniać jaho važna jak maha chutčej.
(Milinkievič: ) «Važna było zrabić heta da kanikułaŭ, tamu što studenty, moładź vielmi radykalnaja, aktyŭnaja, choča dziejańniaŭ, i kali b my praciahnuli da vosieni – heta było b zusim niesurjozna. A ciapier my majem hety plan i pačynajem dziejničać. Letam budzie mienš pracy, uvosień značna bolš. Ułada znachodzicca ŭ kryzisie – siońnia maralnym, zaŭtra ŭ ekanamičnym. I my musim być padrychtavanyja da hetaha. Ale samaje hałoŭnaje dla nas – nie zmahańnie z uładaj, a zmahańnie za ludziej».
Krytyčna hladzić na raspracavany plan dziejańniaŭ staršynia Abjadnanaj hramadzianskaj partyi Anatol Labiedźka. Jon zajaviŭ, što dakument – tolki pieršy krok, važny i nieabchodny.
(Labiedźka: ) «Patrebnaja dadatkovaja prapracoŭka, tamu što raspracoŭniki pajšli šlacham uklučeńnia ŭsiaho taho, što prapanujecca. I dakument atrymaŭsia davoli eklektyčny. Tamu patrebny budzie jašče niekatory čas dla dapracoŭki hetaha dakumenta».
Siabra rabočaj hrupy, aktyvist Partyi BNF Viktar Ivaškievič zajaviŭ, što stratehičnaja meta kaalicyi palahaje ŭ patrabavańni svabodnych, demakratyčnych vybaraŭ. U planie kankretna skazana, jak hetaha damahacca.
(Ivaškievič: ) «Praź cisk na ŭsie orhany dziaržaŭnaj ułady ŭ vyhladzie mirnych akcyjaŭ pratestu, masavych manifestacyjaŭ prymusić Pałatu pradstaŭnikoŭ pryniać adpaviedny zakon i pastanovu, jakija harantujuć praviadzieńnie svabodnych i demakratyčnych vybaraŭ prezydenta i parlamentu ŭ 2007 hodzie».
Dakument, jaki prapanavany na abmierkavańnie, skłaŭsia z prapanovaŭ subjektaŭ kaalicyi, u tym liku Abjadnanaj hramadzianskaj partyi, jakaja vystupaje za praviadzieńnie kanhresu demsiłaŭ.
(Ivaškievič: ) «Kanhres demsiłaŭ u składzie delehataŭ 2005 hodu pavinien być terminova sklikany ŭ vypadku ŭzmacnieńnia realnaj pahrozy suverenitetu Biełarusi. Druhoje – kanhres demsiłaŭ moža być sklikany na rašeńnie Palityčnaj rady ŭ luby inšy čas, i treciaje – što kanhres demsiłaŭ abaviazkova pavinien być sklikany pierad svabodnymi, demakratyčnymi vybarami. U sensie, kali kaalicyi ŭdasca damahčysia svabodnych, demakratyčnych vybaraŭ, to pierad hetymi vybarami pavinien być kanhres, jaki paćvierdzić personu adzinaha kandydata ŭ prezydenty».
