U 2008 hodzie Šviejcaryja z Kipram zajmali 2 i 4 miescy adpaviedna pa kolkaści zamiežnych inviestycyj u Biełaruś.
Zamiežnych inviestycyj, na jakija tak raźličvajuć biełaruskija ŭłady, moža pamienieć, bo ŭ śviecie źnikajuć afšornyja zony. Miž tym mienavita ź ich prychodziła lvinaja dola kapitałaŭ u postsavieckija krainy.
Šviejcaryja, u jakoj skancentravana 27% suśvietnych pryvatnych układaŭ, zhadziłasia davać infarmacyju inšym krainam pra niapłatnikaŭ padatkaŭ. Pra źmiakčeńnie dostupu da bankaŭskaj tajamnicy zajavili taksama Aŭstryja, Lichtenštejn, Andora, takija ž kroki pradprymajuć Sinhapur i Hankonh.
Raźvityja krainy vystupajuć za skaračeńnie kolkaści afšornych zonaŭ. Jany spadziajucca takim čynam źmienšyć deficyt biudžetu, pavysić padatkovyja nadychodžańni. Viarnuć hrošy sa svojesablivych padatkovych rajaŭ – niaprostaja zadača dla luboj dziaržavy. Skazać, jakija sumy mahli vyvieźci ź Biełarusi ajčynnyja biznesmeny, składana. Asnoŭnaja častka biznesu skancentravana ŭ rukach dziaržavy, tamu naŭrad ci miljardy.
Tym nie mienš, mienavita z afšornych zonaŭ idzie vialikaja častka inviestycyj u Biełaruś.
Naprykład, u 2007 hodzie Šviejcaryja zajmała ŭ rejtynhu bujniejšych biełaruskich inviestaraŭ treciaje miesca, Kipr – piataje. Brytanskija Virhinskija astravy, jakija spynilisia na adzinaccataj prystupcy, ukłali ŭ našu krainu bolš za Polšču, Čechiju, Šviecyju.
U 2008 hodzie Šviejcaryja z Kipram vyjšli ŭvohule na 2 i 4 miescy adpaviedna. Z terytoryi Šviejcaryi było ŭkładziena 1,22 miljarda dalaraŭ. Kali kapitał pačnie adtok z hetych krain, im pryjdziecca spačatku jak minimum prajści lehalizacyju ŭ siabie na radzimie, što pavinna zamarudzić inviestycyi ŭ Biełaruś.
