22 červienia na trecija ŭhodki śmierci Vasila Bykava na Ŭschodnich mohiłkach sabralisia rodnyja i blizkija piśmieńnika, prychilniki jaho tvorčaści, kab ušanavać jahonuju pamiać.
Unijacki śviatar a. Andrej Abłamiejka pravioŭ paminalnaje nabaženstva. Źviartajučysia da prysutnych jon adciemiŭ: «Ja rady, što Boh daŭ Biełarusi takoha čałavieka, jak Vasil Bykaŭ».
Vystupili rodnyja i siabry Vasila Ŭładzimieraviča – Ryhor Baradulin, jaki praśpiavaŭ kałychanku, tuju samuju, što piśmieńniku ŭ malenstvie śpiavała mama, žonka Iryna Michajłaŭna, siabar i ziemlak Valancin Błakit, prafesar Jury Chadyka. Piśmieńnik i vydaviec Uładzimier Siŭčykaŭ raspavioŭ pra svaju hutarku z «milicyjantam ad litaratury» hienerałam Čarhincom, jaki miž inšym paviedamiŭ pra ekanamičnuju niemetazhodnaść drukavańnia tvoraŭ Bykava, pra što nibyta śviedčać markietynhavyja daśledvańni. Dyj rodnyja Vasila Bykava nia jduć z prośbami i pakłonami da ŭładaŭ. Adnak, jak zaznačyŭ U. Siŭčykaŭ, popyt na prozu Bykava jość i dokazam hetamu jość vydańnie tvoraŭ biełaruskaha piśmieńnika za miažoj – u Rasiei, Polščy. Barys Sačanka paviedamiŭ pra publikacyju ŭ «Dziejasłovie»ŭ vieraśni nieviadomaj dahetul apovieści «Blindaž» (1987 hod napisańnia). Taksama ŭ planach praciah «Doŭhaj darohi damoŭ», jaki ŭžo rychtujecca ŭ druk.
Aficyjnyja ŭłady hetym razam byli pradstaŭlenyja asobami ŭ cyvilnym, jakija ŭvažliva ŭsłuchoŭvalisia ŭ słovy vystupoŭcaŭ. Jany zaŭvažna ažyvilisia, kali maładyja ludzi ŭ sakołkach z nadpisami «Małady front» uźniali bieł-čyrvona-biełyja ściahi. U chutkim časie na terytoryi mohiłak źjaviłasia i patrulnaja mašyna. Adnak aktyŭnych dziejańniaŭ milicyjanty nie pradprymali.
Siamion Piečanko
