Sud Homielskaha rajona 24 sakavika abviaściŭ pryhavor u dačynieńni da žychara adnoj ź viosak rajona, byłoha supracoŭnika adździeła departamienta achovy MUS, zvolnienaha z orhanaŭ unutranych spraŭ niekalki hadoŭ tamu.
Jaho abvinavacili va ŭčynieńni hvałtoŭnych dziejańniaŭ sieksualnaha charaktaru ŭ dačynieńni da čatyrochhadovaj dziaŭčynki.
Jak paviedamiŭ BiełaPAN namieśnik staršyni suda Homielskaha rajona Arciom Kamałyjeŭ, mužčyna 1969 hoda naradžeńnia pryhavorany da vaśmi hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu.
Jamu inkryminavałasia złačynstva, praduhledžanaje častkaj 3 artykuła 167 KK (dziejańni sieksualnaha charaktaru, učynienyja ŭ dačynieńni da zaviedama małaletniaj).Baćkam dziaŭčynki jon pavinien vypłacić uron u 2 młn. rubloŭ.
Z prysudam abvinavačany nie zhodny i maje namier jaho abskardzić.
Pavodle materyjałaŭ spravy, hvałt byŭ učynieny ŭ lipieni 2008 hoda, kali dziaŭčynka prajšła ŭ hości da susiedskaha chłopčyka, ź jakim naviedvała adnu hrupu dziciačaha sadka.
Baćka chłopčyka i ŭčyniŭ hvałtoŭnyja dziejańni sieksualnaha charaktaru. Na sudzie jon rastłumačyŭ hety tym, što byŭ u stanie mocnaha ałkaholnaha apjanieńnia. Potym dzicia raskazała ab zdareńni babuli. Maci dziaŭčynki źviarnułasia ŭ milicyju, sprava była pieradadziena ŭ prakuraturu Homielskaha rajona.
Śledčy prakuratury trojčy prymaŭ pastanovu ab admovie ŭ raspačynańni kryminalnaj spravy «z‑za adsutnaści składu złačynstva»,
prakuror rajona admianiaŭ hetyja pastanovy na padstavie skarhi maci dziaŭčynki.
Pavodle słoŭ A.Kamałyjeva,
heta nie adzinkavy vypadak hvałtu ŭ dačynieńni da dziaciej u rehijonie.
Tak, u 2008 hodzie 27‑hadovy žychar Homielskaha rajona byŭ pryhavorany da 12 hadoŭ pazbaŭleńnia voli na padstavie anałahičnaha artykuła KK. Jaho achviaraj stała 12‑hadovaja dziaŭčynka. U złačyncy padčas ekśpiertyzy vyjavilisia psichičnyja adchileńni i chraničny ałkahalizm. Prysud nabyŭ moc.
U sud Lelčyckaha rajona pieradadziena sprava ŭ dačynieńni da jašče adnaho byłoha supracoŭnika departamienta achovy MUS, jakoha abvinavačvajuć va ŭčynieńni dvuch zhvałtavańniaŭ, u tym liku 15‑hadovaj školnicy. Miarkujecca, što razhlad spravy ŭ sudzie pačniecca ŭ krasaviku.
