Pravasłaŭnaja carkva dała dazvoł na adpiavańnie pravaabaroncy Jany Palakovaj, jakaja pakončyła z saboj u noč na 7 sakavika.
Pra heta BiełaPAN paviedamiła juryst Tamara Siarhiej.
Pavodle jaje słoŭ, adpiavańnie adbudziecca 14 krasavika ŭ adnoj z salihorskich cerkvaŭ.
«2 krasavika my chadzili na pryjom da ŭładyki Fiłareta, skłali prašeńnie na jaho imia. Nas, mianie i susiedku Palakovaj, pryniaŭ sakratar mitrapalita. I ranicaj 10 krasavika maci Jany, Nieaniła Michajłaŭna, atrymała błahasłavieńnie ad mitrapalita Fiłareta na adpiavańnie Jany Palakovaj», — paviedamiła T.Siarhiej.
Jak zaznačyła juryst, pa pravasłaŭnaj tradycyi adpiavańnie pamierłaha možna pravieści na praciahu 40 dzion paśla jaho śmierci.
15 krasavika zakančvajecca 40‑dzionny termin z dnia śmierci Palakovaj. 14 krasavika maci zahinułaj pravaabaroncy spoŭnicca 70 hadoŭ.
Jana Palakova, juryst pa prafiesii, źjaŭlałasia aktyvistkaj niezarehistravanaj arhanizacyi «Pravavaja dapamoha nasielnictvu», supracoŭničała ź inšymi pravaabarončymi arhanizacyjami, uvachodziła ŭ skład inicyjatyŭnaj hrupy dački Alaksandra Kazulina Volhi na parłamienckich vybarach 2008 hoda.
3 sakavika 2009 hoda sud Salihorskaha rajona pryznaŭ Palakovu vinavataj pa č. 2 art. 400 KK (zaviedama niepraŭdzivy danos). Jaje, u pryvatnaści, abvinavacili ŭ niepraŭdzivym danosie na supracoŭnika milicyi i pryhavaryli da dvuch z pałovaj hadoŭ abmiežavańnia voli z adbyvańniem pakarańnia ŭ papraŭčaj ustanovie. Akramia taho, pa rašeńni suda jana pavinna była vypłacić milicyjanieru 1 młn. rubloŭ u jakaści kampiensacyi za maralny ŭron. Palakova ličyła siabie nievinavataj. Jana pakončyła žyćcio samahubstvam u noč na 7 sakavika.