Jon zakłapočany tryvožnymi tendencyjami ŭ ekanomicy.
Pra źmieny ŭ składzie ŭrada, jakija majuć adbycca, zajaviŭ Alaksandr Łukašenka 16 krasavika padčas razhladu kadravych pytańniaŭ, paviedamiŭ Pieršy kanał.
«Chto siońnia nie moža pracavać, toj sydzie, — zajaviŭ biełaruski kiraŭnik. — Chto moža pracavać va ŭradzie, u administracyi, na vašych pasadach, toj budzie pracavać.
Litaralna praz tydzień‑dva buduć praviedzieny pryznačeńni bolš istotnyja, jakija tyčacca niekatorych členaŭ urada, niekatorych kiraŭnikoŭ respublikanskich orhanaŭ ułady i kiravańnia».
Pavodle słoŭ A.Łukašenki, vyniki pracy ekanomiki ŭ pieršym paŭhodździ pakažuć «absalutna dakładna i aholena, kali chočacie, na što my zdolnyja i ci zmožam my ŭ hetaj situacyi vyžyć», «jakaja ŭ nas dynamika, ci jość u nas tendencyja da palapšeńnia».
A.Łukašenka zajaviŭ pra niedapuščalnaść karupcyi i «raschlabanaści kadraŭ». «Siońnia ŭ Homielskaj vobłaści pavodle majho daručeńnia zavieršana pravierka palaŭničaj hetak zvanaj spravy, dzie vialikija načalniki milicyi, kiraŭniki bujnych pradpryjemstvaŭ, kiraŭniki Homielščyny papalavali tak, što siońnia davodzicca ŭ miežach kryminalnaj spravy raźbiracca, — paviedamiŭ A.Łukašenka. — Ja nie budu zabiahać napierad, pra heta ludzi daviedajucca, ale daravańnia nie budzie nikomu. Palaŭničy? Paluj. U nas jość zakon, kali łaska, abjadnoŭvajciesia, źbirajciesia, kuplajcie licenziju i rabicie heta sumlenna. Niedapuščalna, kab ludzi, nadzielenyja ŭładaj, jakija jaje ŭvasablajuć, nachabna parušali zakon».
