vačyma našaje siamji. Da vychadu pieršych tamoŭ Zboru tvoraŭ Maksima Tanka.
My vakoł Tanka
Kali vyjšli pieršyja dva tamy Zboru tvoraŭ Maksima Tanka, našaja siamja ŭzhadała pra nieaby-jakoje dačynieńnie da słavutaje asoby.
Kastuś Ścieburaka (1911 h. naradžeńnia; u 30-ja hady vučyŭsia ŭ Vilni na mastaka) uzhadaŭ:
– Pry Polščy niekalki razoŭ Tank haściavaŭ u našaj chacie na chutary Subačy la Kryvičoŭ. Darečy, kožny karenny žychar Naračanskaha kraju – sučaśnik Maksima Tanka – zapeŭnić vas, što prymaŭ piśmieńnika ŭ svajoj chacie.
Anatol Ścieburaka (1926 h. naradžeńnia; krajovy separatyst) adhuknuŭsia šyrokaviadomaj u peŭnym asiarodku prykazkaj «Maksim Tank i Prytycki prapili rajon Kryvicki». Čym patłumačyŭ dačynieńnie da kolišnich administracyjna-terytaryjalnych pieraŭtvareńniaŭ na Zachodniaj Biełarusi.
Mikoła Ścieburaka (1957 h. naradžeńnia; lekar ź Vialejki) raspavioŭ historyju, jakuju čuŭ ad śv.pam. dacenta Lavona Askaldoviča, jaki pracavaŭ u abłasnoj kliničnaj bolnicy ŭ Baraŭlanach:
– Kali Maksim Tank telefanavaŭ lekaram, kab vyrašyć pytańni pa zdaroŭi ci ŭładkavać kahości ŭ špital, jon nikoli nie nazyvaŭsia narodnym paetam Biełarusi, ale kazaŭ: «Turbuje deputat Viarchoŭnaha Savietu SSSR Maksim Tank...»
Adnojčy pavažany deputat skardziŭsia doktaru na samačućcie:
– Vysoki cisk maju!
Na što dacent adreahavaŭ:
– Nu, šanoŭny, na to ž vy i Tank!
Anatol Ścieburaka (1983 h. naradžeńnia; supracoŭnik Nacyjanalnaj biblijateki Biełarusi) adznačyŭ, što peŭny čas praciraŭ portki za tymi ž partami ŭ budynku staroj himnazii ŭ Vialejcy, za jakimi siadzieŭ niekalki hod i budučy klasyk.
Usievaład Ścieburaka (1981 h. naradžeńnia; vykładnik BDTU) prosta praciahnuŭ tradycyju dačynieńnia da vialikaha, advučyŭšysia piać hod u pedahahičnym universytecie imia Maksima Tanka...
