(fota-AFT)
Kali śviny hryp praciahvaje imkliva pašyracca, u Mieksicy raspaŭsiudziłasia novaja moda: pa-mastacku aformlenyja maski na tvar. Mieksikancy, što pavinny asłaniać tvar, kab nie zarazicca śmiartelnaj chvarobaj, vyrašyli, što nie varta zadavolvacca adno šabłonnym biełym koleram, i z srodka zaściarohi zrabili vydatnyja ŭzory prykładnoha mastactva. Jak paviedamlaje «Łos-Anželes Tajms» Miechika-Sici hetymi dniami pieratvaryŭsia mała nie ŭ Vieniecyju: vuličny natoŭp strakacić ad usiakich-roznych malunkaŭ na maskach.
Šmatlikija biznesoŭcy nakinulisia na redkuju mahčymaść, i cełyja kamandy afarmlalnikaŭ uvichajucca, kab raspracavać maski z raznastajnymi malunkami. Adčynilisia staronki ŭ siecivie, jakija onłajn pradajuć modnyja maski nie tolki mieksikancam, ale i achvočym u inšych krainach. Azdoblenyja maski chutka źnikajuć z palicaŭ, i na siakija-takija, papularnyja, madeli navat nazirajecca deficyt.
Što vyjaŭlena na maskach? Niekatoryja dyzajniery, znajšoŭšy śmiešnyja baki ŭ śmiartelnaj niebiaśpiecy, rysujuć na maskach paciešnych parsiučkoŭ. Na dziciačych maskach namalavanyja adviečnyja kvietački i mulciašnyja hieroi. Usio roŭna jak nadpisy na majkach, maski na tvarach vyražajuć prychilnaści ci zacikaŭleńni svaich uładalnikaŭ, a časam, jak u vypadku ź siarpom i mołatam — palityčnuju pazicyju.
