Sojm Partyi BNF, pasiadžeńnie jakoha adbyłosia 16 maja, vyjaviŭ šerah unutrypartyjnych supiarečnaściej.
Siabry Sojmu bolšaściu hałasoŭ adchilili prapanavany staršynioj partyi Lavonam Barščeŭskim prajekt rezalucyi, u jakoj vykładziena pazicyja pa šerahu pryncypovych momantaŭ unutry- i zamiežnapalityčnaj situacyi.
U dakumiencie, u pryvatnaści, išła razmova ab stvareńni ŭ krainie «kiravanaj apazicyi»: «Prachodzić raźmiežavańnie palityčnych sił, dahetul apazicyjnych antydemakratyčnym i antybiełaruskim uładam, na tych, chto idzie na supracoŭnictva ź imi, i tych, chto paśladoŭna adstojvaje kaštoŭnaści svabody, demakratyi i niezaležnaści».
Prapanavany Barščeŭskim prajekt taksama praduhledžvaŭ nastupnaje: členy Partyi BNF, jakija zajmajuć kirujučyja pasady ŭ inšych arhanizacyjach, što płanujuć vyłučać svaich kandydataŭ na pasadu prezidenta na budučych vybarach, pavinny dobraachvotna na praciahu miesiaca vyjści z partyi.
Padčas pasiadžeńnia sojma Barščeŭski raskrytykavaŭ udzieł členaŭ Partyi BNF u Ruchu za Svabodu.
«Ruch — heta psieŭdaendeašnaja struktura, jakaja hulaje ŭ palityku. Pryjšoŭ čas skazać, dzie my — u ruchu abo padparadkoŭvajemsia partyjnaj dyscyplinie», — zajaviŭ palityk. Pavodle słoŭ Barščeŭskaha, členy partyi nie pavinny «siadzieć na dźviuch pasadach i razvalvać partyju».
Takaja pazicyja nie znajšła razumieńnia ŭ mnohich členaŭ Sojmu. Naprykład, namieśnik staršyni partyi Alaksiej Janukievič ličyć hetaje patrabavańnie pamyłkovym. Na jaho dumku, jano moža paciahnuć abvastreńnie ŭnutrypartyjnych sprečak. U cełym, na dumku Janukieviča, prajekt rezalucyi «nie byŭ padrychtavany naležnym čynam».
Kamientujučy BiełaPAN pasiadžeńnie Sojmu, Barščeŭski zajaviŭ, što kiraŭnictva partyi praciahnie pracu nad prajektam rezalucyi. Na dumku staršyni partyi, dakumient nie byŭ pryniaty z-za taho, što ŭ siońniašnim pasiadžeńni nie ŭdzielničali niekalki členaŭ Sojmu, jakija znachodziacca za miažoj.
Nastupnaje pasiadžeńnie Sojmu Partyi BNF projdzie ŭ červieni.
