Biełaruskaja pravasłaŭnaja carkva i biźnies-koły Biełarusi vyjšli na pryncypova novy ŭzrovień uzajemarazumieńnia.
Takuju dumku vykazaŭ Mitrapalit Minski i Słucki Fiłaret, Patryjaršy Ekzarch usiaje Biełarusi na sumiesnym pasiadžeńni 18 maja Biełaruskaj navukova-pramysłovaj asacyjacyi, Asacyjacyi biełaruskich kamiercyjnych bankaŭ i Apiakunčaje rady Duchoŭna-adukacyjnaha centra BPC.
«Z hetaha vysokaha ŭzroŭniu nam bolš bačny nie tolki pryčyny ŭnutrynacyjanalnych i suśvietnych padziej, ale i mietady pieraadoleńnia ciažkaściej», - skazaŭ Uładyka.
Pradstajaciel BPC adznačyŭ, što ŭdzielniki pasiadžeńnia padvodziać vyniki sumiesnaj raboty pravasłaŭnych chryścijan, «jakich pradstaŭlajuć, z adnaho boku, śviaščennanačalle i klir carkvy, a z druhoha - pradstaŭniki dziełavych kołaŭ našaha hramadstva». «Za hady sumiesnaj pracy my nie tolki lepš daviedalisia adzin pra adnaho, ale i vyznačyli koła tych spraŭ, za jakija my budziem nieści ahulnuju adkaznaść pierad Boham i ludźmi. My adkaznyja za losy carkvy, za stanovišča spraŭ u Ajčynie, za stan svaich rozumaŭ i sercaŭ», - dadaŭ mitrapalit.
Udzielniki sustrečy źviarnulisia da kiraŭnikoŭ pradpryjemstvaŭ i arhanizacyj, pradprymalnikaŭ i ŭsich hramadzian Biełarusi z prośbaj «padtrymać imknieńni kiraŭnictva Biełarusi, Biełaruskaj pravasłaŭnaj carkvy i inšych kanfiesij, a taksama kanstruktyŭnych sił hramadzianskaha hramadstva ŭ duchoŭna-maralnym vychavańni hramadzian».
