Vialiki rok‑kancert pad Mienskam

23 traŭnia (subota) adbudziecca pieršy ŭ hetym stahodździ na terytoryi Biełarusi vialiki fest biełaruskaha roku na volnym pavietry — «Bela Music‑09».

Ad 16 da 23‑j placoŭka aeradromu «Baravaja» prymie lideraŭ biełaruskaj aktualnaj muzyki. Siarod ich — jašče niadaŭna zabaronienyja ŭładami hurty Neuro Dubel i «Pałac». Na ajčynnym «oŭpen‑ejry» nie budzie tolki N.R.M., ale na adnoj scenie z Varaškievičam i Kulinkovičam zaśpiavaje Piotr Jałfimaŭ.

Kiraŭnik infa‑centru festu Bela Music‑09 Siarhiej Budkin kaža: «Na fiestyvali nie budzie ijerarchii — chedłajniery ŭsie. Kryter adzin — jaskravaja biełaruskaja muzyka». Na «oŭpen‑ejry» jak na «oŭpen ejry»: ni tabie mułkich kresłaŭ, ni zahadaŭ nie tančyć u prachodach. Stamiŭsia tančyć? Pasiadzi na traŭcy i prosta pasłuchaj. Na terytoryi festu buduć stajać handlovyja pałatki ź ježaj i pitvom (nie pivam).

Jak dajechać

U pryncypie, heta niedaloka. Placoŭka na «Baravoj» za jakich 300 mietraŭ ad minskaha mikrarajonu «Zialony Łuh». Ale, admysłova dla nieamataraŭ chadzić, ad stancyi mietro «Uschod» da miesca festu z 15‑j da 23‑j śpiecrejsam tudy‑nazad buduć jeździć aŭtobusy. Košt kvitka na aŭtobus — 600 rubloŭ. Možna dabracca pa‑inšamu: haradskim transpartam da handlovaha centru «Akvabieł» i ad jaho prajści jakich 500 mietraŭ napierad da placoŭki, aryjentujučysia na ŭkazalniki «Bela Music‑09».

Na poli aeradromu budzie arhanizavanaja biaspłatnaja parkoŭka. Zajezd z aŭtadarohi Kałodziščy—Zasłaŭje. Aryjencir — na ŭkazalnik Bela Music, kirujciesia instrukcyjami inśpiektaraŭ DAI.

Kvitki na sam fiestyval — 20 tys. Dzietki da 10 u supravadžeńni darosłych — zadarma. Kvitki možna nabyć niepasredna na imprezie, a taksama napiaredadni ŭ bujnych teatralnych kasach Minsku.

Ciomny konik

RASTOP POWER TRIO siarod ¬udzielnikaŭ? Chto heta? Heta Alaksandr Rastopčyn, udzielnik «Suzorja» i «Pieśniaroŭ». U 1990‑ch źjechaŭ u Štaty i, zrabiŭ¬šy karjeru z nula, ličycca zorkaju ńju‑iorkskich bluzavych kłubaŭ. Razam z Rastopčynym z Amieryki pryjedzie jašče adna zorka — Alaksiej Kazłoŭski, niaźmienny bas‑hitaryst hurtu «Suzorje». Da ich dałučycca bubnač Andrej Fiłataŭ, jaki koliś taksama hraŭ u «Suzorji», a ciapier — u «Kramie».

Čamu nie budzie N.R.M.?

Lavon Volski paśla napružanych hadoŭ frontmen nadumaŭ uziać praciahły adpačynak. Ale vystupić solny prajekt inšaha eneremaŭca, hitarysta Pita Paŭłava, GARADzKIJA.

Piatro Jałfimaŭ siarod udzielnikaŭ?

Tak. Pieradhistoryja: prychilniki Piatra źviarnulisia da arhanizataraŭ «Bela Music‑09» z prośbaj padtrymać biełaruskaha śpievaka paśla historyi z «Jeŭrabačańniem». Kiraŭnik fiestyvalu Aleh Chamienka pahadziŭsia. Tym bolš, Jałfimaŭ braŭ udzieł u «Basoviščy», a adna pieśnia ź jaho biełmoŭnaha prajektu PitBul uvachodziła ŭ lik najlepšych pieśniaŭ hodu pavodle viersii internet‑partału «Tuzin Hitoŭ».

Lavon K

Chto i kali budzie vystupać na «Bela Music‑09»:

***

Aleh Chamienka: Z čynoŭnikami možna damaŭlacca

Pra kancert «Bela Music» hutarka z mastackim kiraŭnikom fiestyvalu, lideram hurtu «Pałac» Aleham Chamienkam.

«Naša Niva»: Aleh, raskažycie krychu, što heta ŭvohule za mierapryjemstva takoje «Bela Music»?

Aleh Chamienka: Heta budzie taki vialiki biełaruski «fiestyval fiestyvalaŭ». My vielmi doŭha išli da takoha «oŭpen‑ejru», ciapier voś narešcie ŭdałosia. Budzie taki voś svojeasablivy kancert najlepšaha, što jość u biełaruskaj muzycy, samaha aktualnaha. U pieršuju čarhu roku. Na feście buduć žyvyja hurty, vykanaŭcy. Ludzi prosta zmohuć dobra pravieści volny čas.

«NN»: Čaho asabista Vy čakajecie ad fiestyvalu?

ACH: Čakaju, što fiestyval stanie znakavym. Najbolš masavym u krainie. Vielmi spadziajusia, što atrymajecca zrabić jaho štohadovym. Kali zmožam, to naleta płanujem pravodzić fest ciaham dvuch dzion. Z udziełam nie tolki ŭžo viadomych hurtoŭ, ale i maładych. Tych, kaho zachočuć pačuć sami hledačy.

«NN»: Ci možna havaryć, što «Bela Music» moža stać alternatyvaj «Basovišču»?

ACH: Dumaju, što nie. Heta dva absalutna roznyja mierapryjemstvy. Darečy, u Baravoj taksama budzie hurt, što budzie pradstaŭlać «Basovišča», pakul nie chaču kazać, chto mienavita. Pryjeduć ludzi z «Basovišča», pahladzieć jak u nas usio projdzie.

«NN»: A prablemaŭ z čynoŭnikami nie było padčas padrychtoŭki festu?

ACH: Čynoŭniki taksama žyvyja ludzi, i ź imi možna damaŭlacca. Pryznacca, byli niekatoryja niepryjemnyja momanty, byli składanaści. Ale ž takoha maštabu fiestyvalu jašče nikoli nie było ŭ Biełarusi. Ideja vielmi słušnaja, i jana pavinna była ŭvasobicca ŭ žyćcio. Usio ž z majho boku nijakich narakańniaŭ da čynoŭnikaŭ niama.

«NN»: U subotu vy budziecie hrać u Biełarusi pad adkrytym niebam, tady jak jašče niekalki hadoŭ tamu davali paŭzabaronienyja kancerty. Adčuvańni niejkija novyja jość, chvalujeciesia?

ACH: Kali ŭ nas nie było vialikich kancertaŭ u Biełarusi, to heta nie značyć, što ŭ nas ich nie było ŭvohule. Pa vialikamu rachunku, jakaja roźnica, ci ty hraješ u Biełastoku, Varšavie, Maskvie ci ŭ Minsku? Publika paŭsiul prykładna adnolkavaja.

«NN»: Jakija niečakanki možna budzie čakać ad «Bela Music»?

ACH: Pasprabujem zrabić niekatoryja niečakanaści, ale chaj heta budzie siurpryzam. Kali kryšačku pryadkryć tajamnicu, to skažu, što mahčymym viadučym festu budzie Piotr Jałfimaŭ. Jon taksama śpiaje niekalki piesień. Nasamreč Jałfimaŭ robić vielmi aktualnuju muzyku, cikavy prajekt. Pryjeduć z Amieryki Alaksandr Rastopčyn i Alaksiej Kazłoŭski. Mahčyma, jany nie takija viadomyja ŭ nas, jak tam, ale hetyja ludzi byli ŭ składzie pieršaha biełaruskaha rok‑hurtu «Suzorje».

«NN»: Šmat chto cikavicca, čamu niama N.R.M. Jany admovilisia ad udziełu?

ACH: Nichto nie admaŭlaŭsia. Sprava ŭ tym, što ŭ Lavona Volskaha ciapier tvorčy pierapynak. Jon nie daje na dadzienym etapie nijakich kancertaŭ.

«NN»: Na jakuju kolkaść ludziej raźličvajecie, što pryjdzie na fest?

ACH: Pry dobrym nadvorji budzie nie mieniej, čym piać tysiač čałaviek. Hałoŭnaje, kab ludziam spadabałasia i jany zastalisia zadavolenyja.

Hutaryŭ Źmicier Pankaviec