Staršynia Ruchu za Svabodu nakiravaŭ šerahu jeŭrapiejskich palitykaŭ zvarot, u jakim źviartaje ŭvahu na znachodžańnie za kratami vaŭkavyskich pradprymalnikaŭ i haładoŭku Mikałaja Aŭtuchoviča, prablemy rehistracyi NDA i partyjaŭ, a taksama kaža pra naśpiełaść i važnaść źnižeńnia koštaŭ na vizy dla biełarusaŭ.
List atrymajuć kancler Niamieččyny Anhieła Mierkiel, prezident Francyi Nikala Sarkazi, viarchoŭny kamisar ES pa vonkavaj palitycy i biaśpiecy Chaŭjer Sałana, staršynia Jeŭraparłamienta Hans‑Hiert Pioterynh, kamisar JEZ pa vonkavych suviaziach Bienita Fierera‑Valdnier.
U zvarocie havorycca, što razam z šeraham krokaŭ pa libieralizacyi ekanomiki i niekatorymi paviarchoŭnymi źmienami ŭ śfiery demakratyzacyi
biełaruskija ŭłady praciahvajuć praktyku cisku na demakratyčnych aktyvistaŭ i admaŭleńnia biełarusam fundamientalnych pravoŭ svabody vykazvańnia, schodaŭ i abjadnańnia.
Alaksandr Milinkievič nahadvaje, što pradprymalniki Mikałaj Aŭtuchovič, Jury Lavonaŭ, Uładzimir Asipienka užo bolš za try miesiacy ŭtrymlivajucca ŭ turmie. Pry hetym śledčyja dziejańni ŭ dačynieńni da ich praktyčna nie pravodziacca. 16 krasavika Mikałaj Aŭtuchovič raspačaŭ haładoŭku pratestu. Jaho stan zdaroŭja mocna pahoršyŭsia, i isnuje realnaja pahroza jaho žyćciu.
Staršynia Ruchu taksama zaznačaje, što Miniust Biełarusi praciahvaje raniejšuju praktyku nierehistracyi NDA i palityčnych partyj na padstavie nadumanych pryčynaŭ. Za apošni čas admoŭlena ŭ rehistracyi pravaabarončamu centru «Viasna» i Asamblei demakratyčnych NDA, a taksama partyi Biełaruskaja chryścijanskaja demakratyja. Na aktyvistaŭ BCHD praciahvajecca cisk z boku śpiecsłužbaŭ, miascovych ideołahaŭ dy kiraŭnikoŭ pradpryjemstvaŭ.
Alaksandr Milinkievič vykazvaje spadziavańnie, što ŭsie fakty parušeńnia pravoŭ čałavieka buduć pa‑raniejšamu ŭzdymacca ŭ ramkach krytyčnaha dyjałohu i kanstruktyŭnaha zaanhažavańnia Biełarusi ŭ supracoŭnictva ź Jeŭraźviazam i znojduć stanoŭčaje rašeńnie.
Taksama lider Ruchu za Svabodu źviartaje ŭvahu na toje, što paśla pryniaćcia našaj krainy ŭ prahramu Uschodniaha Partniorstva biełaruskaje hramadstva vielmi raźličvaje, što Jeŭrapiejski sajuz i jahonyja dziaržavy‑čalcy ŭ najbližejšy čas i ŭ adnabakovym paradku źmienšać košty na šenhienskija vizy dla hramadzianaŭ Biełarusi.
Na dumku Alaksandra Milinkieviča, taki krok budzie jaskravym sihnałam dla ŭsich biełarusaŭ, zacikaŭlenych u zbližeńni Biełarusi z abjadnanaj Jeŭropaj.