Tvorčaje abjadnańnie «Žalezny voŭk» adradžaje žanr žyvapisu XV—XVIII st. Plon ich pracy možna pabačyć u minskim Muziei kino, dzie prachodzić vystava «Niea-Sarmacki partret».
“Sarmacki partret” — forma paradnaha rycarskaha partretu, ŭłaścivaja vyjaŭlenčamu mastactvu VKŁ i Rečy Paspalitaj. Mastaki źviartali ŭvahu nie stolki na rysy tvaru vyjaŭlenaha na partrecie čałavieka, kolki na elemienty jaho adzieńnia, pradmiety, što jaho atačajuć. Sarmacki partret nasyčany simvolikaj. Praz detali my možam razhadać charaktar vyjaŭlenaha, jaho majomasny stan, navat pasadu.
Ideja adradžeńnia “Sarmackaha partretu” uźnikła ŭ kiraŭnika navapołackaha rycarskaha kłubu “Žaleznaha voŭka” Andreja Mikałajeva. Za spravu ŭziałasia hrupa maładych mastakoŭ. Napačatku pieraapranali siabroŭ i paplečnikaŭ u rycarskija stroi i malavali ź ich, maksimalna nabližana da stylu «sarmackaha partretu».
Pastupova ŭ karciny pačali pranikać idei i asablivaści madernovaha mastactva.«Sarmatyzm» evalucyjanavaŭ u «nieasarmatyzm»: pačaŭsia adychod ad realistyčnaj maniery žyvapisu, źjavilisia pałotny ŭ styli analityčnaha kubizmu, abstraktnyja i suprematyčnyja partrety.
Samyja realistyčnyja i žyvyja na vystavie partrety napisanyja Julijaj Chinteman i Hieorhijem Tankovičam. Asabliva uražvaje “Partret kapitana piachotnaj charuhvy Linusa” Julii Chinteman, jaki stvaraje uražańnie, što vy siadzicie za adnym stałom z rycaram i voś-voś jon vam praciahnie kufal piva i raspaviadzie pra svaju nialohkuju dolu. Ale varta adyjści kolki krokaŭ ad stała kapitana Linusa, i padpadaješ pad uražańnie ad “Stomlenaha vajara” Andreja Mikałajeva. I chočacca paziachnuć razam z tym rycaram, namalavanym u styli dzikich farbaŭ favizmu dy lepšych tradycyjach kubizmu.
Choć “Žalezny voŭk” maluje sarmackija partrety ŭžo dzieviać hadoŭ, heta pieršaja takaja vystava ŭ stalicy. Debiut nieasarmataŭ možna pabačyć na svaje vočy na praciahu hetaha tydnia ŭ Muziei historyi biełaruskaha kino, vuł.Śviardłova 4. Tamsama vystaŭlajucca zvykłyja dasiahnieńni rycarskaj narodnaj haspadarki: miačy, šałomy, daśpiechi. Usio z sučasnych materyjałaŭ, ale funkcyjanalnaje. Nie parežciesia.
