Za apošnija troje sutak na terytoryi Biełarusi nazirałasia niaŭstojlivaje nadvorje, paŭsiudna prajšli daždžy, va ŭschodnich i centralnych rajonach krainy — mocnyja.
Jak paviedamlaje Respublikanski hidramieteacentr, najbolšaja kolkaść apadkaŭ za hety čas vypała:
u Čačersku — 48 mm, abo 48 litraŭ vady na kvadratny mietr terytoryi (58% ad miesiačnaj normy), Homieli — 45 mm (57%), Vasilevičach — 43 mm (54%), Minsku — 40 mm (49%).
Na bolšaj častcy terytoryi adznačalisia navalnicy, dniom 12 červienia i ŭ noč na 13 červienia pry navalnicach pa ŭschodzie krainy ŭ asobnych rajonach paryvy vietru dasiahali 15 m/s (Čačersk — 30 m/s, Homiel, Orša — 25 m/s), dzie-nidzie vypadaŭ hrad (u Homieli dniom 12 červienia adznačaŭsia ŭmierany hrad z dyjamietram hradzin 17 mm).
U ranišnija časy miescami ŭźnikaŭ tuman. Maksimalnaja tempieratura pavietra była plus 14—19°S, tolki 12 červienia pa ŭschodniaj pałovie krainy pavietra prahravałasia da plus 20—28°S (plus 27,5°S — u Kaściukovičach).
Minimalnaja tempieratura ŭnačy znachodziłasia ŭ miežach ad plus 5°S da plus 12°S, u noč na 13 červienia pa ŭschodzie krainy plus 13—16°S.
Pavodle źviestak Respublikanskaha hidramieteacentra, siaredniasutačnaja tempieratura pavietra 14 červienia akazałasia na 3—5°S nižejšaj za klimatyčnuju normu.
