Voś hetyja dva vahončyki - i jość mytny punkt.
U "Hazeli" z numaram 17-26 siadziać mytniki.
Punkt strachavańnia.
Tak vyhladaŭ siońnia prapuskny punkt Redźki. Fota Julii Daraškievič.
Na biełaruska‑rasijskaj miažy razhornutyja mytnyja pasty. Tym časam Smalenskaja mytnia atrymała vusnaje rasparadžeńnie prapuskać u Rasiju biełaruskuju małočnuju pradukcyju, aproč suchoha małaka.
U Viciebskaj, Homielskaj, Mahiloŭskaj abłaściach razhornutyja mytnyja masty na biełaruska‑rasijskaj miažy. Jak paviedamili BiełaPAN u pres‑słužbie Dziaržaŭnaha mytnaha kamiteta, «pasty sfarmavanyja, ad dzieviaci ranicy jany ŭžo na miažy».
Siońnia, 17 červienia, Biełaruś uviała ŭzmocnieny režym kantrolu za pieramiaščeńniem hruzaŭ na asnoŭnych rasijska‑biełaruskich mahistralach. Takoje rasparadžeńnie daŭ kiraŭnik Dziaržaŭnaha mytnaha kamiteta Alaksandr Špileŭski ŭ suviazi z ukazańniem prezidenta. «Za 15 dzion červienia 2009 hoda mytnymi orhanami ŭ zvyčajnym režymie pracy zatrymana kantrabandnych tavaraŭ na sumu 8 młrd. 620 młn. rubloŭ. Za 2008 hod na kalininhradskim kirunku źnikła hruzaŭ na 10 młn. dołaraŭ», — rastłumačyŭ Špileŭski.
U svaju čarhu dziaržsakratar Rady biaśpieki Biełarusi Juryj Žadobin zajaviŭ, što rašeńnie biełaruskich uładaŭ ź`iaŭlajecca «simietryčnym adkazam» na dziejańni rasijskaha boku. «Hetyja zachady buduć całkam anałahičnyja tym dziejańniam, jakija ŭžo na praciahu mnohich hadoŭ praktykuje rasijski bok u asobie orhanaŭ Fiederalnaj mytnaj słužby», — skazaŭ kiraŭnik Savieta biaśpieki.
Pavodle jaho słoŭ, biełaruski bok vymušany sa škadavańniem kanstatavać, što nijakich źmien u padychodach rasijskich partnioraŭ da supracoŭnictva apošnimi dniami tak i nie adbyłosia. «Adsutničaje ŭsialaki kanstruktyŭny padychod, naceleny na ŭzajemaprymalnaje rašeńnie. Pad nadumanymi padstavami praciahvaje nanosicca ŭron našaj ekanamičnaj biaśpiecy», — padkreśliŭ Žadobin.
Tym časam Smalenskaja mytnia Rasii atrymała vusnaje rasparadžeńnie prapuskać u Rasiju biełaruskuju małočnuju pradukcyju, aproč suchoha małaka.
Načalnik pres‑słužby Smalenskaj mytni Ŭładzimir Safonaŭ skazaŭ Interfaksu, što ciaham paŭhadziny čakajecca piśmovaje rasparadžeńnie. A pakul — pavodle vusnaha rasparadžeńnia — małočny hruz ź Biełarusi «prapuskajem u raniejšym abjomie, za vyklučeńniem suchoha małaka».
Pieršy namieśnik staršyni Dziaržaŭnaha mytnaha kamitetu Jaŭhien Savieljeŭ zajaviŭ, što «pakul nijakaj infarmacyi ad rasijan pra propusk biełaruskaj małočnaj pradukcyi nie prychodziła».
Ja. Savieljeŭ skazaŭ, što jamu taksama nieviadoma pra takija kroki rasijskaha boku. Dalejšyja dziejańni biełaruskich mytnikaŭ buduć zaležać ad rasparadžeńnia biełaruskaha mytnaha kamitetu.
