My hatovy viarnucca da razmovy ab paŭnavartasnym adnaŭleńni ŭzajemnaj dypłamatyčnaj prysutnaści pry ŭmovie poŭnaj admieny ŭviedzienych suprać našaj krainy sankcyj i ich pravavoj asnovy — Akta ab demakratyi ŭ Biełarusi»,
— zajaviŭ Alaksandr Łukašenka 30 červienia na sustrečy z delehacyjaj kanhresa ZŠA, jakaja znachodzicca ŭ Minsku z adnadzionnym vizitam.
«Nastaŭ čas adyści ad starych schiem i stereatypaŭ i pa‑novamu pahladzieć na našy adnosiny. Upeŭnieny, što vaš vizit adkryje novuju staronku ŭ historyi biełaruska‑amierykanskich adnosinaŭ», — skazaŭ Łukašenka.
Jon padkreśliŭ, što Biełaruś vystupaje za «bolš ciesnyja, raznapłanavyja, kanstruktyŭnyja adnosiny» sa Złučanymi Štatami Amieryki. «Ale jany pavinny hruntavacca na pryncypach suvierennaj roŭnaści bakoŭ, nieŭmiašańnia va ŭnutranyja spravy inšaj dziaržavy, uzajemnaj pavahi i davieru», — padkreśliŭ prezident.
Łukašenka vykazaŭ upeŭnienaść u tym, što adnosiny Biełarusi i ZŠA «abaviazkova narmalizujucca».
«Pytańnie zaklučajecca ŭ tym, chto heta zrobić — my z vami, abo pakiniem inšym ludziam, jakija pryjduć paśla nas. Davajcie heta zrobim, nie adkładvajučy na potym tyja prablemy, jakija isnujuć», — źviarnuŭsia prezident da kanhresmienaŭ.
Łukašenka prapanavaŭ prybrać «usie zavały, jakija my z vami zrabili i jakija siońnia pieraškadžajuć našym adnosinam», a zatym — pačać «pisać historyju bolš śvietłymi farbami».
Pry hetym jon zaznačyŭ, što ŭ Biełarusi razumiejuć vyhadu ad supracoŭnictva z ZŠA.«Supracoŭničajučy z vami i abapirajučysia na vas, my zrobim žyćcio našaha naroda bolš dastojnym i chutčej vyjdziem z nastupstvaŭ suśvietnaha kryzisu», — skazaŭ Łukašenka. Jon zaznačyŭ, što dla naładžvańnia adnosinaŭ Biełaruś hatova admovicca ad svaich intaresaŭ, kali tolki heta nie tyčycca pytańniaŭ suvierenitetu i niezaležnaści krainy.
Prezident ličyć, što pradstaŭniki kanhresa ZŠA časta krytykujuć jaho i Biełaruś u cełym. «Ale, krytykujučy nas, ja chaču, kab vy dobra ŭjaŭlali sabie situacyju ŭ našaj krainie, — padkreśliŭ kiraŭnik dziaržavy. — Iścina pavinna lažać u asnovie hetaj krytyki i ŭ asnovie našych adnosinaŭ».
Jak zajaviŭ Łukašenka, u Biełarusi niama zakrytych tem ad ZŠA:
«My poŭnaściu adkryty, što vy siońnia chočacie ŭbačyć — idzicie i hladzicie. Vam buduć adkryty ŭsie šlachi, pačynajučy ad vajennaha kompleksu i zakančvajučy hramadzianskimi abjektami».
U svaju čarhu kiraŭnik amierykanskaj delehacyi sienatar Biendžamin Karden zaznačyŭ, što z abrańniem novaha prezidenta ZŠA «źjavilisia novyja mahčymaści dla źmieny adnosinaŭ pamiž našymi krainami». «Ščyra spadziajusia, što mienavita my zmožam sadziejničać narmalizacyi našych adnosinaŭ, ale nadzvyčaj važna, kab heta adbyvałasia na fonie poŭnaj adpaviednaści kryteryjam ABSIE ŭ śfiery demakratyi i pravoŭ čałavieka», — skazaŭ Karden.
***
Nahadajem, u listapadzie 2007 hoda ZŠA ŭviali ekanamičnyja sankcyi ŭ dačynieńni da kancerna «Biełnaftachim» u suviazi z parušeńniem pravoŭ čałavieka ŭ Biełarusi. Sankcyi praduhledžvali zamarožvańnie ŭsich bankaŭskich rachunkaŭ kancerna i jaho pradstaŭnictvaŭ u Hiermanii, Łatvii, va Ukrainie, u Rasii i Kitai, jakija znachodziacca pad jurysdykcyjaj ZŠA, a taksama rachunkaŭ daččynaj kampanii «Biełnaftachim Ju‑es‑ej». Aprača taho, amierykanskim biźniesmienam pradpisvałasia ŭstrymacca ad kantaktaŭ z kancernam.
U sakaviku 2008 hoda, paśla taho jak ułady Biełarusi admovilisia vyzvalić z turmy eks‑kandydata ŭ prezidenty Alaksandra Kazulina, pasły Biełarusi i ZŠA byli adklikany z Vašynhtona i Minska dla kansultacyj, a štaty abodvuch pasolstvaŭ — skaročany da minimumu.
Tady ž Minfin ZŠA apublikavaŭ udakładnieńni, zhodna ź jakimi pad dziejańnie sankcyj traplali pradpryjemstvy, dola «Biełnaftachima» ŭ jakich składaje 50% i bolš.
5 vieraśnia 2008 hoda Minfin ZŠA na paŭhoda źmiakčyŭ ekanamičnyja sankcyi ŭ dačynieńni da pradpryjemstvaŭ «Łakafarba» i «Połack‑Škłovałakno». U lutym 2009 hoda dziejańnie hetaha rašeńnia było pradoŭžana da 1 červienia, a zatym — da 30 listapada 2009 hoda.
