Fota: kadr ź videa
«Da niadaŭniaha času my taksama akazvali hetu pasłuhu, u nas byli kapačy dla mohiłak», — raspaviadaje Chryścina z Oršy. Žančyna — indyvidualnaja pradprymalnica. Jaje firma zajmajecca vyrabam pomnikaŭ.
«Ale potym na kavid zachvareli i my sami, i našy supracoŭniki. Dziela ich biaśpieki vyrašyli na niejki čas prypynić akazańnie hetaj pasłuhi. Nam usio roŭna telefanujuć ludzi, prosiać dać kapačoŭ. Niekatoryja tak i kažuć: «Niemahčyma padrychtavać jamu da pachavańnia. U horadzie niemahčyma znajści kapačoŭ».
Ja, naprykład, nie ździŭlenaja, što firmy sapraŭdy vymušanyja pačynać kapać mahiły ledź nie z nočy. Ale treba razumieć i toje, što mnohija praz epidemijałahičnuju abstanoŭku, jak i my, pakul prosta admovilisia ad hetaj pasłuhi.
Ź inšaha boku, ludziej dakładna ciapier pamiraje bolš, čym, naprykład, hod tamu. My bačym heta i pa našych zakazach. Popyt na pomniki i mohiłkavuju aharodžu pavialičyŭsia z nadychodam novaj chvali karanavirusa. Ale bolš za ŭsich zakazaŭ pa pachavańni i spadarožnych pasłuhach ciapier u dziaržaŭnaha śpieckambinata (havorka idzie pra Aršanski śpieckambinat — «NN»)».
Fota: orbiz.by
«Zdaroŭje svaich supracoŭnikaŭ ciapier daražejšaje za vyhadu»
Pašukavik adrazu vydaje 16 prapanoŭ pa vykopvańni mohiłak u Oršy. Telefanujem. Vyśviatlajem, što niekatoryja firmy sapraŭdy prypynili akazańnie pasłuhi pa vykopvańni mohiłak, bo pracoŭnyja i sami chvarejuć.
«Vyrašyli, što zdaroŭje svaich supracoŭnikaŭ ciapier daražejšaje za vyhadu, — havoryć pradprymalnik Ałan. — Tamu zaraz admovilisia ad hetaj pasłuhi».
«My pierajšli da krychu inšaj pracy. Ciapier zajmajemsia repatryjacyjaj niabožčykaŭ, — havoryć jašče adziny pradprymalnik, jakoha my zastali ŭ Italii. — Stała pamirać značna bolš ludziej, u tym liku biełarusaŭ za miažoj. Ale pachavać ich rodnyja imknucca na radzimie. Voś dniami, naprykład, pryvieźli niabožčyka z Ałbanii. Jašče raniej — ź Italii».
«My bolš pieraaryjentavalisia na vyrab pomnikaŭ. Hučyć, mahčyma, cynična, ale vyhady z hetaha bolš, čym z kopki mahił. A ryzyki — mieniej. Vykapać adnu mahiłu kaštuje ŭ siarednim 100 rubloŭ. Ale kali pracaŭniki zachvarejuć, to za dva niepracoŭnyja tydni my stracim bolš, čym kali b zajmalisia vyrabam pomnikaŭ i aharodžaŭ», — havoryć jašče adzin pradprymalnik Alaksandr.
Ale jość i tyja, chto nie zhodny z aŭtaram videa. Kažuć, što zakazaŭ nie tak i šmat.
«Ja indyvidualny pradprymalnik. Zajmajusia budaŭničym biznesam. Ale akazvaju pasłuhi pa padrychtoŭcy jam dla pachavańniaŭ. Niadaŭna raźmiaściŭ try abjavy z hetaj nahody. Ale za niekalki tydniaŭ nichto nie patelefanavaŭ. Košty nie zadziraŭ. Heta na vypadak, kali chtości padumaje, što jany ŭ nas zanadta vysokija, i tamu da nas nie źviartajucca», — havoryć aršaniec Jaŭhien Varabjoŭ.
U Aršanskim śpieckambinacie, što zajmajecca pachavańniami, z žurnalistami razmaŭlać admovilisia.
Orša ŭvachodziła ŭ trojku lepšych rajonaŭ pa vakcynacyi, ale zachvorvalnaść ciapier značna vyšejšaja
Cikava, što pa źviestkach haziety «Sovietskaja Biełoruśsija» za 20 lipienia hetaha hoda ŭ «Aršanskim rajonie pryščepki ad COVID-19 užo zrabiŭ kožny piaty darosły». Na toj momant rajon uvachodziŭ u trojku lepšych u vobłaści pa tempach imunizacyi». U hetym ža materyjale skazana: spravy ŭ płanie vakcynacyi ŭ horadzie i rajonie nastolki dobryja, «što ŭ sielskaj miascovaści imunizacyja nasielnictva idzie navat chutčej za haradskuju. Tut pryščeplena kala čatyroch tysiač čałaviek va ŭzroście 60+».
Miarkujučy pa hetych danych, u Oršy i Aršanskim rajonie sapraŭdy byli ŭsie šancy pieražyć čaćviortuju chvalu karanavirusa našmat lahčej za treciuju. Bo pryščeplena tak šmat ludziej.
Centr vakcynacyi ŭ Oršy. Fota: vitbichi.by
Ale praz dva miesiacy paśla vychadu takoha aptymistyčnaha materyjału doktar-epidemijołah Aršanskaha zanalnaha centra hihijeny i epidemijałohii Leanid Lavonćjeŭ zajaviŭ inšaje:
«Z kanca žniŭnia nazirajecca istotnaje pavieličeńnie zachvorvańnia na karanavirusnuju infiekcyju, jakoje jašče bolš uzmacniłasia ŭ vieraśni. Zachvorvalnaść značna vyšejšaja za taki ž pieryjad minułaha hoda. Adznačajecca istotnaje pavieličeńnie kolkaści chvorych, jakim patrabujecca špitalizacyja».
Pry hetym u minułym hodzie navat pa aficyjnych danych Ministerstva achovy zdaroŭja situacyja z karanavirusam ŭ Aršanskim rajonie była najhoršaj na ŭsioj Viciebščynie.
«Kali davodzicca vybirać pamiž uzrostavym i maładziejšym pacyjentam, biarom maładziejšaha»
My pahavaryli ź miedykam, jakaja pracuje ŭ Oršy niepasredna z kavidnymi pacyjentami. Bajučysia stracić pracu praz znosiny ź niedziaržaŭnymi žurnalistami, žančyna paprasiła zastacca ananimnaj.
«Situacyja z karanavirusam u horadzie vielmi niaprostaja, — uzdychaje žančyna. — Niekatorych pacyjentaŭ pryvoziać zanadta pozna — ź vielmi vysokim adsotkam paražeńnia lohkich. Časam miedyki elemientarna nie paśpiavajuć zrabić patrebnyja im analizy, kab razabracca sa stanam pacyjenta.
Fota ilustracyjnaje, vitbichi.by
Hučyć žudasna, ale časam chvorych davodzicca sartavać. Kali davodzicca vybirać pamiž uzrostavym i maładziejšym pacyjentam, a miescaŭ u reanimacyi amal niama, biarom maładziejšaha…»
«Ludziej mienš nie stanovicca. Naadvarot, pad infiekcyjnymi kabinietami ŭ paliklinikach uvieś dzień čerhi, — raskazvaje miedyk. — Adsartavać pacyjentaŭ vielmi składana.
Na pryjom da doktara prychodziać ludzi biez tempieratury, ale ŭžo padčas pryjomu akazvajecca, što pach u čałavieka stračany. Jamu dajuć nakiravańnie na PŁR — vyśviatlajecca, što kavid. A hety ž čałaviek siadzieŭ u čarzie z tymi, u kaho kavidu, moža, i niama. Razumiejecie? Heta amal niemahčyma spynić.
U minułuju vosień bolšaść pacyjentaŭ sapraŭdy byli ŭzrostavymi, a ŭžo ŭ hetuju vosień ciažkija vypadki byli i siarod 18-hadovych, i siarod 25-hadovych.
Tak, ich našmat mienš za pažyłych ludziej, ale toje, što novy štam kosić jašče i moładź, heta praŭda. Siaredni kantynhient našych pacyjentaŭ siońnia — ludzi 1965-1977 hoda naradžeńnia».
Parazmaŭlać z nami pra realnuju kolkaść śmierciaŭ pacyjentaŭ z vyjaŭlenym kavidam u Oršy śpiecyjalisty, jakija majuć dostup da aficyjnych danych, taksama pahadzilisia tolki na ŭmovach ananimnaści.
«U siarednim, pa aficyjnaj statystycy Ministerstva achovy zdaroŭja, kožny dzień ad zachvorvańniaŭ, uskładnienych karanavirusnaj infiekcyjaj, u Biełarusi pamirajuć 14-17 čałaviek. Na samoj ža spravie takuju kolkaść pamierłych z kavidam my amal kožny dzień fiksujem tolki ŭ našym horadzie.
Kab statystyka była nie takoj žudasnaj, ludziej śpisvajuć tak: u słupok «pryčyna śmierci» tych, u kaho karanavirus praciakaŭ na fonie inšych chraničnych zachvorvańniaŭ, upisvajuć mienavita chraničnaje zachvorvańnie. Takija jość u bolšaści pamierłych. Tym pamierłym, u kaho akramia kavidu, zafiksavanych raniej chraničnych zachvorvańniaŭ nie było, u pryčyny śmierci ŭpisvajuć COVID-19».
