Bunt mienskich taksistaŭ: «052» zmahajecca za prava pracavać.
U minuły čaćvier kiraŭnictva pryvatnaj firmy «Nabat», uładalnicy taksovak «052», paviedamiła svaim supracoŭnikam pra prypynieńnie dziejnaści i masavaje zvalnieńnie. U paniadziełak u słužby «052» musili anulavać licenziju na vykarystańnie prafesijnaj radyjočastaty. Pryčynaj hetaha staŭsia aryšt dyrektara firmy, jakoha padazrajuć va ŭtojvańni padatkaŭ.
Inicyjatyva pazbavić «Nabat» licenzii zychodziła ad Kamitetu dziaržaŭnaha kantrolu. Jahony departament finansavych raśśledavańniaŭ vyjaviŭ parušeńni ŭ dziejańniach raniejšaha kiraŭnictva abjadnańnia. Paśla hetaha Minsuviazi j vyrašyła adklikać licenziju.
Kiroŭcy nia stali čakać paniadziełka: u piatnicu blizka paŭsotni taksovak zablakavali padjezd da budynku ANT na vuł.Kamunistyčnaj. Taksisty patrabavali žyvoha eteru, kab źviarnuć uvahu na pahrozu masavaha zvalnieńnia. Pad achovaj milicyi da ich vyjšła zdymačnaja hrupa, jakaja zapisała patrabavańni manifestantaŭ. Paśla taksisty pasłuchmiana raźjechalisia na zahad DAI, pahraziŭšy naastatak: budzie vam kalarovaja revalucyja – žoŭtaja ŭ čornyja šašački.
Kiraŭnictva «Nabatu» prykładaje ŭsie namahańni, kab znajści vyjście z sytuacyi. I peŭnyja pośpiechi jość. Prynamsi hety paniadziełak nia staŭ apošnim dla pradpryjemstva – dyspetčarskaja słužba prymaje zamovy. Jak patłumačyła adna ź jaje supracoŭnic, taksoŭki karystajucca druhim kanałam radyjočastotaŭ – amatarskim. «Vyrašeńnie pytańnia ź licenzijaj moža raściahnucca na niekalki dzion, adnak my majem nadzieju, što ŭsio skončycca dobra», – z aptymizmam zaznačyła jana.
«052» – najbujniejšaja mienskaja słužba taksovak: aŭtapark jaje naličvaje paŭtysiačy aŭtamabilaŭ, na jakich pracuje kala 700 kiroŭcaŭ.
Sytuacyja z taksoŭkami «052» nie adzinkavaja ŭ Biełarusi. U Bieraści ad 5 lipienia praciahvajecca haładoŭka ŭładalnikaŭ maršrutnych taksovak. 13 čałaviek pratestujuć suprać respublikanskaha zboru za ŭvoz transpartu ŭ kamercyjnych metach. Uładalniki maršrutak nabyli svoj transpart da ŭstupleńnia ŭ siłu adpaviednaha dekretu, adnak padatkovyja instancyi praciahvajuć nakładać na ich vielizarnyja štrafy.
