Za dzieviać miesiacaŭ u Minsku zarehistravali 958 narkatyčnych złačynstvaŭ (u 2020 hodzie — 758). U tym liku 644 złačynstvy, źviazanyja sa zbytam narkotykaŭ i psichatropaŭ (u 2020-m — 488).
Za hety čas 331 pacyjent trapiŭ u balnicu z narkatyčnym atručeńniem (letaś było 244), siamiora ź ich byli niepaŭnaletnimi.
Złačyncy pradajuć nie tolki kłasičnyja narkotyki raślinnaha pachodžańnia, ale i sintetyčnyja — sumiesi, spajsy, miksy, marki.
Zafiksavanyja novyja schiemy raspaŭsiudžvańnia anłajn. Pry hetym prakuratura ličyć efiektyŭnaj pracu siłavikoŭ u baraćbie z raspaŭsiudžvańniem narkotykaŭ.
Apošnim časam źjaŭlajecca ŭsio bolš navinaŭ pra toje, što školniki zajmajucca prodažam narkotykaŭ. Na pačatku listapada ŭ Minsku zatrymali 17-hadovuju dziaŭčynu, kali jana źbirałasia zrabić zakładki z «sollu», u jaje znajšli siem pakunkaŭ z narkotykami, doma było jašče 15. Taksama narkotyki znajšli ŭ jaje 15-hadovaj saŭdzielnicy, abvinavačanyja mieli ŭsio dla fasoŭki i ŭpakoŭki narkotykaŭ.
U siaredzinie listapada ŭ Minsku i Babrujsku zatrymali dziesiać padletkaŭ (uzrost — ad 14 da 17 hod), jakija raskładvali pa tajnikach zabaronienyja rečyvy. Litaralna ŭ tyja ž dni ŭ Viciebsku zatrymali dvuch siabroŭ — chłopca 15 hod i dziaŭčynu 16 hod, jakija taksama pracavali zakładčykami — raspaŭsiudžvali miefiedron.
U hety ž čas u Minsku 16-hadovaja dziaŭčyna trapiła ŭ balnicu z atručeńniem mietadonam, dźvie nočy jana nie načavała doma, a kali viarnułasia, maci daviałosia vyklikać chutkuju.
Za raspaŭsiudžvańnie narkotykaŭ praduhledžvajecca surjoznaje pakarańnie — ad 5 da 25 hod źniavoleńnia (č. 2-5 art. 328 KK). Za zachavańnie narkotykaŭ biez mety zbytu taksama mohuć pakarać terminam da 5 hod «chimii» abo ad 2 da 5 hod pazbaŭleńnia svabody (č.1 art. 328 KK). Adkaznaść nastupaje z 14 hod.
