ZET. Go-records, 2006.
Hienijalna.
Adzin z samych doŭhačakanych albomaŭ hetaha stahodździa ad vialikich kanśpirataraŭ biełaruskaha roku, jakich, zrešty, užo daŭno ŭsie vyličyli. «Ludzi ŭ maskach» piajuć pra nadzionnyja rečy – pra Ajčynu, jakaja vyhladaje, jak stomlenaja žančyna, pra Dziaržteleradyjo, jakoje vysmoktvaje ŭsie žyćciovyja siły, i zichotkaha anioła, jaki abaviazkova prylacić. «Ludzi ŭ maskach» znajšli svoj idealny muzyčny farmat, i ŭsio ŭ ich na miescy – dzie hitarka z drajvam, a dzie skrypačka miłaja, a dzie ŭsio razam. Heta toj vypadak, kali słuchaješ dysk niekalki razoŭ i anijak nia možaš abrać upadabanuju pieśniu, bo ŭ kožnaj jość niešta takoje, što šče doŭha nie adpuskaje. Z asacyjacyjnaj tryjady N.R.M. – «Krambambula» – ZET apošnija vyłučajucca najpierš svajoj niepradkazalnaściu. Zetaŭcy mohuć vydać uzor bardaŭskaj pieśni, urazić sacyjalnaj čytankaj, zakasić pad «Tito i Tarantula» ci ździvić adarvana-pravakacyjnym «Ja ciabie lublu, Ja ciabie zabju».
Dobruju pałovu piesień z dyska hramada ŭžo paśpieła vyvučyć na pamiać, a «Biełakryły anioł» paśpieŭ adznačycca ŭ jakaści hałoŭnaha biełaruskaha hita-2005, pavodle vynikaŭ na «Tuzinie Hitoŭ».
Reklamnaja razynka: kožny, chto nabyvaje dysk, aŭtamatyčna atrymlivaje śviežy numar hazety «Radzima», adredahavanaj znanym biełaruskim hazetnikam Ch.Jačubovikam. Dobra, što vydaŭcy paznačyli, što redakcyja nie adkazvaje za źmieščanyja na staronkach hazety paklop i abrazu. A to paciahnuli b jaje ŭ sud adrazu.
