8 žniŭnia spoŭniłasia paŭhoda z momantu zatrymańnia vaŭkavyskich pradprymalnikaŭ Mikałaja Aŭtuchoviča, Juryja Lavonava i Uładzimira Asipienki.
Jany byli zatrymany 8 lutaha. 18 lutaha pradprymalnikam było vystaŭlena abvinavačańnie na padstavie art. 218 Kryminalnaha kodeksa (naŭmysnaje źniščeńnie ci paškodžańnie majomaści). 23 červienia ŭ dačynieńni da Aŭtuchoviča i, jak paviedamiła MUS, «inšych asob» raspačata sprava na padstavie art. 359 KK (terarystyčny akt) u vyhladzie padrychtoŭvańnia (art. 13). Zatrymanyja znachodziacca ŭ SIZA № 1 Minska.
Z 16 krasavika pa 16 lipienia Aŭtuchovič pravodziŭ haładoŭku, patrabujučy ŭ samy karotki termin albo pieradać spravu ŭ sud, albo źmianić usim padślednym mieru strymańnia z utrymańnia pad vartaj na padpisku ab niavyjeździe.
Jak paviedamiŭ BiełaPAN advakat Aŭtuchoviča Pavieł Sapiełka, jaho padabaronny «vielmi pavolna» vychodzić z haładoŭki. «Na apošniaj sustrečy jon havaryŭ, što jašče praciahvaŭ hublać vahu. Ale zaraz stan jaho zdaroŭja stabilizavaŭsia», — skazaŭ Sapiełka.
Advakat spadziajecca na chutkaje zaviaršeńnie papiaredniaha rasśledavańnia, kab jon i jaho padabaronny zmahli pačać znajomicca sa spravaj.
«Siońnia śledstva pavinna vyrašyć pytańnie ab pradaŭžeńni terminaŭ utrymańnia pradprymalnikaŭ pad vartaj. Ja čakaju, što śledstva budzie pradoŭžana jašče na miesiac», — skazaŭ Sapiełka. Pry hetym jon adznačyŭ, što advakata ab pradaŭžeńni terminaŭ utrymańnia pad vartaj nie infarmujuć — zhodna z zakonam, znajomiać z hetym rašeńniem tolki padabaronnaha.
