Zatrymanyja viečaram 14 žniŭnia ŭ Minsku karespandenty telekanała NTV užo znachodziacca ŭ Rasii. Pra heta paviedamiŭ karespandent minskaha biuro NTV Viktar Kuźmin.
14 žniŭnia kala 19 hadzin Ihara Karnieja, Alaksieja Małkava i Juryja Babienku ludzi ŭ cyvilnym vyvieli ź ich numara ŭ hateli Mižnarodnaha adukacyjnaha centra (IBB), dzie spynilisia žurnalisty. Hetyja ž ludzi vypisali Małkava i Babienku z hatela. U dalejšym ich miescaznachodžańnie było nieviadomaje.
Viktar Kuźmin nie vałodaje infarmacyjaj, departavali žurnalistaŭ abo prosta prapanavali im pakinuć krainu. »Hetyja ludzi — ź inšaj redakcyi telekanała, tamu my ź imi praktyčna nie kantaktavali», — zaznačyŭ jon. Tym nie mienš, Kuźmin vykazaŭ mierkavańnie, što pretenzii biełaruskich uładaŭ da žurnalistaŭ mahli ŭźniknuć praź ich pracu ŭ krainie biez akredytacyi.
Jak paviedamiła radyjostancyi «Echo Moskvy» pres-sakratar kanała Maryja Biezbarodava, zdymačnaja hrupa prahramy «Nadzvyčajnyja zdareńni i rasśledavańni» pryjechała ŭ Minsk dla zdymak dakumientalnaha rasśledavańnia ab źnikłych u Biełarusi ŭ roznyja hady palitykach i žurnalistach. Jany źbiralisia adźniać intervju z žonkami i svajakami biasśledna źnikłych ludziej.
* * *
U Minsku źnikła zdymačnaja hrupa prahramy «Čriezvyčajnyje proisšiestvija i rasśledovanija» rasijskaha telekanała NTV.
Alaksiej Małkaŭ i Jury Babienka pryjechali ŭ Minsk dla zdymak dakumientalnaha rasśledavańnia pra źnikłych u Biełarusi apanientaŭ ułady. Byli zapłanavanyja intervju z žonkami i svajakami źnikłych. Jany ŭziali intervju ŭ žonki Viktara Hančara Zinaidy Hančar, a taksama ŭ maci Źmitra Zavadskaha Volhi Ryhoraŭny.
Jak raspavioŭ ułasny karespadent NTV u Biełarusi Viktar Kuźmin,
u piatnicu kala 19-j u supravadžeńni ludziej u cyvilnym rasijanie pakinuli hatel Mižnarodnaha adukacyjnaha centra, što pa vulicy Haziety «Pravda».
Kuźmin miarkuje, što pryčynaj mahła stać dziejnaść žurnalistaŭ biez akredytacyi MZS.
Pa stanie na 21:30 telefon Małkava byŭ adklučany. U adździaleńni unutranych spraŭ Maskoŭskaha rajona Minska paviedamili, što nijakich žurnalistaŭ im nie dastaŭlali. Dziažurny pasolstva Rasii taksama skazaŭ, što nijakich źviestak adnosna miescaznachodžańnia Małkava i Babienki nie maje.
Pravaabaronca Hary Pahaniajła vykazaŭ dumku, što śpiecsłužby mohuć departavać žurnalistaŭ, jakija ŭzialisia za niazručnuju i balučuju dla biełaruskich uładaŭ temu.
