Achmad Vachidzi znachodzicca ŭ śpisie Interpołu siarod samych šukanych złačyncaŭ.
Kandydat u ministry aborony Iranu Achmad Vachidzi — u śpisie samych šukanych złačyncaŭ Interpołu. U subotu mižnarodnaja palicejskaja arhanizacyja paćvierdziła, što na Vachidzi z 2007 hodu vydadzieny tak zvany «čyrvony cyrkular» — sihnał da vyšuku, aryštu i ekstradycyi. Kiraŭnictva Interpołu prainfarmavała ab hetym usie 187 krain-členaŭ.
Achmad Vachidzi zajmaje post ministra abarony ŭ śpisie ŭradu, jaki pieraabrany prezident Iranu Machmud Achmadziniežad pradstaviŭ na razhlad parłamientu jašče ŭ sieradu. Pakul hety śpis aficyjna nie zaćvierdžany.
Daviedaŭšysia pra toje, što siarod ministraŭ jość proźvišča Vachidzi, svaju zaniepakojenaść vykazali Arhientyna i Izrail: Interpoł vyšukvaje jaho pa padazreńni ŭ arhanizacyi napadu na habrejski kulturny centr u Buenas-Ajresie ŭ 1994 hodzie. Tady zahinuli 85 čałaviek.
U Iranie hetyja abvinavačańni nazyvajuć «sijanisckaj zmovaj» i nahadvajuć, što Vachidzi byŭ namieśnikam ministra abarony apošnija čatyry hady, ale «čyrvony cyrkular» byŭ vydadzieny tolki dva hady tamu.