Ci treba apazicyi i dalej čakać kałapsu režymu ci varta skarystać instynkt samazachavańnia ŭłady, kab pašyryć stupień svabody dla samoj siabie? Zrešty, niečakany sam fakt, što jość jašče ludzi, zdolnyja abjadnacca i prapahandavać palityčnyja alternatyvy, miarkuje palitołah Vital Silicki.
— Jak ni dziŭna, hałoŭny pośpiech apazicyi palahaje ŭ tym, što jana zdoleła samazachavacca. Z 1996 hoda ŭ krainie adsutničaje instytucyjnaja baza dla isnavańnia kankurentnaha palityčnaha pracesu jak takoha. Voś čamu sam fakt, što jość jašče ludzi, zdolnyja abjadnacca i prapahandavać palityčnyja alternatyvy, źjaŭlajecca davoli niečakanym.
Dziejničajučy ŭ niespryjalnych umovach, apazicyja źviałasia da žmieńki adzinak, jakim važnyja kaštoŭnaści, jakija jašče spadziajucca na źmienu ŭłady i jakija da taho ž vypali z sacyjalnaha kantraktu z režymam. U jaje šerahach zastalisia ŭ asnoŭnym tyja, chto byŭ, miakka kažučy, bolš naiŭny, čym inšyja, mahčyma, bolš matyvavany albo prosta lepš za ŭsio zdoleŭ prystasavacca mienavita da apazicyjnaha asiarodku.
Razmovy pra toje, što apazicyja kiepskaja, jaje mała, jana nie ŭmieje razmaŭlać z elektaratam — pustyja. U hrupy, zahnanaj u padpolle, hałoŭnaja matyvacyja — vyžyć. Tak, dziejańni palityčnych lideraŭ skiravanyja najpierš na zachavańnie siabie i svaich strukturaŭ. Ale heta absalutna racyjanalnyja dziejańni ŭ toj situacyi, u jakoj jany apynulisia.
