Kali palityka sustreła kiniematohraf: Čavies i Stoŭn. Fota-AFT
Za sutki da prylota ŭ Minsk prezident Vieniesueły Uha Čavies paśpieŭ pabyvać na čyrvonam dyvanie Vieniecyjanskaha kinafiestyvalu ŭ jakaści zaprošanaha, jak hieroj adnaho z dakumientalnych filmaŭ.
Uha Čaves atrymaŭ pryjom, jaki majuć u Vieniecyi tolki kinazorki i viadomych režysioraŭ: jon pradefilavaŭ pa čyrvonym dyvanie pad uchvalnyja kryki i vopleski publiki. Čaviesu było niaciažka zachapić šanavalnikaŭ svajoj palityčnaj linii i tempieramientu: jon navat špurnuŭ kvietku ŭ natoŭp, a potym vychapiŭ z ruk adnaho fotakarespandenta kamieru, kab zaźniać ułasnuju piersonu.
Čavies pryjechaŭ u Vieniecyju na premjerny pakaz dakumientalnaha filma «Poŭdzień miažy»/South of The Border, u jakim akramia inšych hierojaŭ viadomy amierykanski režysior Olivier Stoŭn zaźniaŭ taksama vieniesuelskaha kiraŭnika.
Na dumku Stoŭna, jahony novy film adlustroŭvaje kardynalnyja źmieny, što adbylisia ŭ Paŭdniovaj Amierycy ŭ apošnija hady. Pavodle Stoŭna jon prezientuje punkt pohladu, supraćlehły pryniatamu ŭ amierykanskich i jeŭrapiejskich ŚMI, jakija zazvyčaj vystaŭlajuć Čaviesa dyktaram.
Da taho ž, u svaim filmie Stoŭn paličyŭ za lepšaje nie dać słova palityčnym apanientam Čaviesa. «Našto šukać zmročny bok chłopca, jaki robić dobryja spravy?!» — kaža Stoŭn, jaki aprača vieniesuelskaha lidera apytvaŭ taksama kiraŭnikoŭ Arhientyny, Brazilii, Ekvadora, Balivii, Kuby i Parahvaja. Razam z tym, Stoŭn pryznajecca, što «Čavies robić niekatoryja rečy biez daj pryčyny, aby pravakavać».
Stoŭn viadomy svaimi mastackimi stužkami, najpierš «Pryrodžanymi zabojcami», ale jon taksama ździejśniŭ niekalki dakumientalnych prajektaŭ, siarod jakich vyłučajecca «Kamandante» (2003), stužka pra Fidela Kastra.
Novy film Stoŭna — pa-za miežami konkursnaj prahramy Vieniecyjanskaha kinafiestyvalu, jaki zakončycca ŭ najbližejšy vychadnyja.
