Vyniki pieršych matčaŭ biełaruskich klubaŭ u Kubku UEFA nadavali aptymizmu. BATE ŭ Barysavie dva tydni tamu biez varyjantaŭ pieramahło małdaŭski «Nistru» – 2:0. Ale lik nie adlustroŭvaŭ realnych siłaŭ na poli. Barysaŭcy mahli zabić i piać hałoŭ.
Mienskaje «Dynama» ŭ haścioch u polskim Lubinie (nia błytać ź Lublinam!) razyhrała vynikovaju ničyju – 1:1 – ź miascovym «Zahłembie». Zastavałasia zadača nie prapuścić udoma. Pahatoŭ biełaruskija kluby ŭ eŭrakubkach jašče ni razu nie sastupali polskim. I «Dynama» 27 lipienia z honaram vykanała hetuju zadaču.
Užo la padychodu da stadyjona było vidać, što na hulniu źbirajecca pahladzieć niamała narodu. Pieršasnaje ŭražańnie nie padmanuła – piać z pałovaj tysiačy hledačoŭ. Kaniečnie, dla Homiela ci Barysava hetaja ličba nie takaja ŭžo i vialikaja, ale dla raśpieščanaj vidoviščami stalicy – heta niamała. Narod pilna kantralavali bajcy PMNS i žaŭniery v/č 3214. Ich taksama było nie našmat mieniej za hledačoŭ.
Unutrany hołas padkazvaŭ – nia varta ŭ hetaj hulni čakać fejeryi hałoŭ, jak u niadaŭnim matčy čempijanatu «Dynama» – BATE, abiedźvie kamandy najpierš buduć addavać uvahu abaronie. Tak jano j atrymałasia.
Pieršy tajm atrymaŭsia sumnym. Supierniki ahułam nanieśli pa varotach udaraŭ piać. Tolki ŭ siaredzinie tajmu hledačy schapilisia za hałovy. Aboronca «Zahłembie» źbiŭ u niejkim metry ad svajoj štrafnoj brazylskaha lehijanera «Dynama» Edu. Palaki, napeŭna, nia viedali, jak vykonvaje padobnyja standarty małady miančuk Siarhiej Kiślak. Jon upeŭniena padyšoŭ da miača i pasłaŭ jaho ŭ ličanych santymetrach vyšej papiarečyny. Astatni čas hledačy adkryta nudzilisia. Śmiašyŭ ich chiba azerbajdžanski arbitar Alijeŭ, raz-poraz prymajučy nie zusim adekvatnyja rašeńni.
U druhim tajmie ŭ składzie mienčukoŭ zamiest inertnaha brazylca Marsijo źjaviŭsia «dynamaŭski» plejmejkier Vital Vaładziankoŭ, jaki niadaŭna vypraviŭsia paśla traŭmy. Jon unios u hulniu biełarusaŭ niejkuju śviežaść, ale istotna źmianić malunak hulni nia zmoh. Hledačy j nadalej praciahvali sumavać, a matč niaspynna praciahvaŭ blizicca da svajho finału. Palaki stali ŭsio bolš aktyŭna ahryzacca ŭ atacy. Navat padumałasia, ci nie prajavicca j siońnia staraja biełaruskaja chvaroba prapuskać hały na apošnich chvilinach matču. I, sapraŭdy, serca čas ad času jokała, kali forvardy «Zahlembie» padychodzili bližej da varotaŭ Artura Laśka, ale ŭ toj viečar abarona «Dynama» była nieprachodnaj. Vopytny Siarhiej Paŭlukovič nie davaŭ palakam ni času, ni prastory dla pryniaćcia rašeńniaŭ. Naprykancy «dynamaŭcy» jašče mahli zabić hoł, ale paśla mocnaha ŭdara Vaładziankova sytuacyju vyratavaŭ polski hałkiper Liberda.
Užo ŭ dadadzieny arbitram čas hulcy «Zahłembie», zrazumieŭšy, što nia zmohuć prajści ŭ nastupny raŭnd, raspačali nievialičkuju bojku, ale jana nia skončyłasia navat vydaleńniem nikoha z futbalistaŭ. Prajšło niekalki sekundaŭ i arbitar daŭ finalny śvistok. «Koŭč» staličnaj kamandy Alaksiej Piatrušyn pieramožna ŭskinuŭ ruki ŭhoru. Takija matčy, kali ŭsio moža vyrašyć adzin hoł, nie dadajuć treneram zdaroŭja.
Heta byŭ pajadynak absalutna roŭnych kamand, dzie bolej pašancavała «Dynama». Biełarusy pa-raniejšamu nie sastupajuć u eŭrakubkach palakam.
BATE ŭ svaju čarhu biez prablem pieramahło «Nistru» i ŭ Kišynevie, usio vyrašyŭ adziny hoł, jaki na 30-aj chvilinie zabiŭ Hienadź Bliźniuk. I heta dobra – lišnija eŭrapunkty biełaruskim klubam nie zaškodziać.
Siońnia, 28 lipienia, a 14-j adbudziecca losavańnie druhoha kvalifikacyjnaha raŭndu Kubka UEFA. Niachaj dla biełaruskich klubaŭ jano budzie ščaślivym.
Źmicier Pankaviec
