16 vieraśnia budzie razhladacca pytańnie pazbaŭleńnia statusa historyka-kulturnaj kaštoŭnaści pomnika pramysłovaj architektury.
Fota globus.tut.by
Na miescy pieršaj minskaj elektrastancyi mohuć zbudavać hatel, paviedamiŭ staršynia Biełaruskaha dobraachvotnaha tavarystva achovy pomnikaŭ historyi i kultury Anton Astapovič. Pavodle jaho słovaŭ, 16 vieraśnia adbudziecca pasiadžeńnie Respublikanskaj navukova-mietadyčnaj rady pa pytańniach historyka-kulturnaj spadčyny pry Ministerstvie kultury, na jakim budzie vyniesiena pytańnie pra pazbaŭleńnie statusa historyka-kulturnaj kaštoŭnaści budynka pieršaj minskaj elektrastancyi, jaki mieścicca ŭ parku Horkaha pobač z cyrkam. Hety ŭnikalny pomnik pramysłovaj architektury, byŭ pabudavany ŭ 1895 hodzie. Kompleks budynkaŭ byłoj elektrastancyi znachodzicca ŭ Dziaržaŭnym śpisie historyka-kulturnych kaštoŭnaściaŭ, adnosicca da 3-j katehoryi materyjalnych nieruchomych historyka-kulturnych kaštoŭnaściej. Stancyja składałasia ź dźviuch paravych mašyn mahutnaściu 50 i 100 konskich sił z tryma dynama-mašynami pastajannaha toku napružańniem 120 volt i tokam 250 ampier kožnaja. Spačatku stancyja zabiaśpiečvała elektryčnaściu centralnuju častku horada. Pobač sa stancyjaj byŭ zbudavany hatel u styli madern, jaki nie adno dziesiacihodździe vykarystoŭvaŭsia minskim cyrkam. Adznačym taksama, što budynki pieršaj staličnaj elektrastancyi byli ŭlubionymi abjektami tvorčaści minskich mastakoŭ-hrafikaŭ – A. Tyčyny, A. Astapoviča, M. Druščyca, P. Hutkoŭskaha dy inš.
