Na biełaruska-litoŭskim forumie kiraŭnik Biełarusi raspavioŭ pra vyniki pieramovaŭ sa svajoj litoŭskaj kalehaj Dalaj Hrybaŭskajte.
Fota Julii Daraškievič.
Fota Julii Daraškievič.
Fota Julii Daraškievič.
Videa: Łukašenka na miažy (www.lrytas.lt)
Łukašenku paścialili čyrvony dyvanok. Pa im jon uvajšoŭ u pamiaškańnie vystavačnaha centru.
Na zajavy Łukašenki prysutnyja reahavali strymanymi apladysmentami. Avacyjaŭ nie było.
Alaksandr Łukašenka «vielmi zadavoleny» praviedzienymi 16 vieraśnia ŭ Vilni pieramovami z prezydentam Litvy Dalaj Hrybaŭskajte.
«My pra ŭsio damovilisia», — dadaŭ jon.
Pieramovy Łukašenki i Hrybaŭskajcie pačalisia ab 11 hadzinie. Zamiest zapłanavanaj adnoj hadziny jany doŭžylisia amal dźvie hadziny. Na pytańnie žurnalista, čamu pieramovy zaniali stolki času, Łukašenka adkazaŭ: «Chiba doŭha? Nam padałosia, što čas prajšoŭ nieprymietna».
Łukašenka ličyć nieprymalnym naviazvańnie krainie vybaru pamiž Eŭropaj i Rasiejaj:
«Mižnarodnyja pryjarytety Biełarusi dakładna vyznačanyja na padstavie našych ułasnych nacyjanalnych intaresaŭ. Mianiać ich dla atrymańnia imhniennych i sumnieŭnych vyhodaŭ my nia majem namieru».
Pavodle Łukašenki, Biełarusi sprabujuć naviazać niejki vybar pamiž Eŭropaj i Rasiejaj, śćviardžajučy pra niesumiaščalnaść hetych dvuch vektaraŭ.
«Liču takuju pastanoŭku pytańnia niapravilnaj», — cytuje vystup Łukašenki na ekanamičnym forumie ŭ Vilni Interfaks. — «Naša pryncypovaja pazycyja — być suviaznym mostam pamiž Uschodam i Zachadam».
«Ja chaču, kab eŭrapiejcy zrazumieli, što nas nielha nachilać, nas nielha prymusić niešta rabić. My adukavanyja ludzi, i my viedajem, što treba rabić i što my možam. (…) My śviata pavinny bierahčy biełaruski narod i jaho intaresy. My nia možam razburać krainu — kanstytucyjny ład i toj šlach, jakim my idziem užo bolej za 10 hadoŭ. Jon prynios nam peŭnyja dyvidendy: my pieršyja z respublik paślasavieckaj prastory padvoili VUP», — zajaviŭ Łukašenka.
Jon padkreśliŭ, što «Biełaruś — eŭrapiejskaja dziaržava. My pastupova damahajemsia i abaviazkova damožamsia taho, kab biełaruskija ekanamičnyja i sacyjalnyja standarty adpaviadali ŭzroŭniu lepšych eŭrapiejskich».
Havoračy pra biełaruska-litoŭskija adnosiny, prezydent vykazaŭ upeŭnienaść, što «navat niekatoryja adroźnieńni ŭ hieapalityčnaj aryjentacyi Biełarusi i Litvy pavinny nas nie raźjadnoŭvać, a słužyć dapaŭnialnym elementam vybudoŭvańnia kanstruktyŭnaha ŭzajemadziejańnia pa vosi Zachad — Uschod».
«Šmat u čym ad hetaha zaležyć biaśpieka i stabilnaść usiaho rehijonu», — papiaredziŭ Łukašenka.
Łukašenka suprać vysokich cenaŭ na šenhienskija vizy
Kiraŭnik krainy raźličvaje, što Eŭraźviaz prymie rašeńnie źnizić košty šenhienskich vizaŭ.
«Ustupleńnie Polščy i krainaŭ Bałtyi ŭ Šenhienskuju zonu značna ŭskładniła pierasoŭvańnie hramadzianaŭ. Čym praviniŭsia biełaruski narod? Kali vy nia lubicie Łukašenku, to rabicie zachady suprać Łukašenki, ale nia suprać biełaruskaha narodu.
Bo dla Łukašenki viza za 60 eŭra — heta nie prablema».Hetyja słovy prysutnyja ŭ zali sustreli śmiecham.
Łukašenka prosić Eŭraźviaz viarnuć handlovyja pryvilei
«Važnym krokam, nakiravanym na aktyvizacyju handlu Biełarusi i Eŭraźviazu, mahło b stać adnaŭleńnie ŭdziełu našaj krainy ŭ Abahulnienaj systemie handlovych preferencyjaŭ Eŭraźviazu», — zajaviŭ kiraŭnik Biełarusi ŭ Vilni.
«Na siońniašni dzień Eŭraźviaz prymianiaje da nas handlovy režym, analahičny tamu, jaki dziejničaje ŭ adnosinach da ZŠA, Aŭstralii, Japonii i šerahu inšych pieradavych industryjalna raźvitych krainaŭ. Całkam vidavočna, što realnyja ekanamičnyja mahčymaści Biełarusi i hetych krainaŭ nieparaŭnalnyja, i my znachodzimsia ŭ mienš vyhodnych umovach», — pieradaje Interfaks słovy Łukašenki.
«Biełaruś abjektyŭna pryvabnaja dla eŭrapiejskaha biznesu», — pierakanany Łukašenka. U svaju čarhu, «Eŭraźviaz važny dla Biełarusi jak krynica najnoŭšych technalohijaŭ i investycyjaŭ (…) My zacikaŭlenyja ŭ realizacyi enerhietyčnych, transpartnych i ekalahičnych prajektaŭ, vyrašeńni ahulnych mytnych prablemaŭ».
Jon ličyć «vielmi svoječasovym źjaŭleńnie inicyjatyvy «Ŭschodniaje partnerstva», jakoje praduhledžvaje pašyreńnie supracoŭnictva Eŭraźviazu z eŭrapiejskimi susiedziami».
Łukašenka pachvaliŭsia, što «Biełaruś adnoj ź pieršych siarod krain-udzielnicaŭ «Uschodniaha partnerstva» prystupiła da raspracoŭki kankretnych rehijanalnych prajektaŭ».
«My aktyŭna pracujem na dadzienym napramku ź Litvoj, Eŭrapiejskaj Kamisijaj, kalehami z Polščy, Ukrainy», — adznačyŭ biełaruski prezydent.
