19 vieraśnia ŭ milicyju vyklikali vilejskich demaktyvistaŭ Uładzimira Malerčuka, Alaksieja Siudaka i Alesia Narkieviča. Na ich byŭ składzieny pratakoł ab administracyjnym pravaparušeńni. Im inkryminujecca parušeńnie Zakonu «Ab masavych mierapryjemstvach» padčas ustalavańnia kryžoŭ pamiaci represavanych. Na nastupnym tydni sprava budzie pieradadziena ŭ sud.
– Pakolki heta sprava palityčnaja, to vyrak budzie abvinavaŭčym, – upeŭnieny Alaksiej Siudak. – Nie viedaju, praŭda, jak dakažuć, što naša mierapryjemstva było niesankcyjanavanym mitynham. Bo my ničoha nie patrabavali, nie adstojvali, nie abmiarkoŭvali sacyjalna-palityčnyja pytańni. Ludzi prosta pastavili kryžy, pamalilisia i ŭskłali kvietki.
«NN»: Čym, na vašuju dumku, abumoŭlena takoje raźvićcio padziejaŭ? Za ŭstalavańnie kamienia na miescy rasstrełu Raścisłava Łapickaha nikoha ž nie sudzili?
AS: Pra jaho my admysłova nidzie nie pisali, kab nie padstaŭlać rajvykankam, aby kamień stajaŭ. Čynoŭniki ž vyrašyli pakazać svaju ŭładu. Tamu i źnieśli jaho pa ŭłasnaj inicyjatyvie. Ale dalej vyrašyli nie iści. Z kryžami situacyja inšaja. Pra ich pisali ŭsiudy. Voś i kamanda źvierchu vilejskim načalnikam pryjšła. A na nas u milicyju padali, kab spynić našuju dziejnaść. Kab im nie prychodziłasia zajmacca nadalej rujnavańniem, a taksama nie rabić spravazdačy pierad svaim načalstvam.
15 vieraśnia Malerčukom, Siudakom, Narkievičam była padpisana zajava na imia načalnika Vilejskaha RAUS, u jakoj jany patrabujuć znajści ludziej, adkaznych za źniščeńnie kryžoŭ va ŭročyščy Krasny Bieražok. Adkazu na zajavu pakul niama.
