Takoje rašeńnie pryniata 23 vieraśnia na siesii deputataŭ Minharsavieta.
Jak paviedamiŭ na siesii načalnik finansavaha ŭpraŭleńnia Minharvykankama Alaksandr Kiernažycki, skaračeńni zakranuć:
sacyjalnuju śfieru (na 84 młrd rub.), žyllova‑kamunalnuju haspadarku (na 79,8 młrd rub.), transpart (na 25,5 młrd rub.), sielskuju haspadarku (202,6 młrd rub.), inšyja haliny (na 90,1 młrd rub.).
U suviazi z tym, što rost zarpłat u biudžetnaj śfiery zamarožany, źnižanyja asihnavańni, jakija pryznačalisia na pavyšeńnie zarobkaŭ (na 65,3 młrd). Vydatki na nabyćcio abstalavańnia i kapitalny ramont skaročanyja na 21,4 młrd rub.
Skaračajucca asihnavańni KUP «Minsktrans», na funkcyjanavańnie orhanaŭ miascovaha samakiravańnia i inšyja raschody. Jak rastłumačyŭ Kiernažycki, skaračeńni finansavańnia sacyjalnaj śfiery niaznačnyja, ekanomija ŭ asnoŭnym zakranie zakupki tavaraŭ i pasłuh pa imparcie.
Skaračeńnie biudžetu źviazana ź niedaatrymańniem u hetym hodzie prybytkaŭ.
«U siońniašnich ekanamičnych umovach minimalnyja niedapastupleńni pa padatku na prybytak čakajucca ŭ sumie 200 młrd. rubloŭ, pa padachodnym padatku — 203,8 młrd. rubloŭ, PDK — 100 młrd. rubloŭ. Hadavy płan pa dachodach pamienšany na sumu 471,8 młrd. rubloŭ», — skazaŭ Kiernažycki.
U cełym dachodnaja častka čakajecca ŭ sumie 4,9 trłn. rubloŭ, na 15% nižej za pieršapačatkova zaćvierdžany płan. Vykanańnie pa raschodach u 2009 hodzie čakajecca ŭ sumie 5,6 trłn. rubloŭ, abo na 7,5% nižej za pieršapačatkovy płan.
Jak nahadaŭ deputatam staršynia Minharsavieta Michaił Matusievič, «raniej my ŭžo skaracili raschodnuju častku na 300 młrd. rubloŭ» (na siesii 17 červienia 2009 hoda). «Praktyka skaračeńnia raschodaŭ źjaviłasia tolki sioleta, raniej deputaty raźmiarkoŭvali dadatkova atrymanyja dachody», — adznačyŭ kiraŭnik harsavieta.
