Imia novaha dyrektara Nacyjanalnaha akademičnaha Vialikaha teatra opiery i baleta Respubliki Biełaruś moža być nazvana ŭ chutkim časie. Pra heta zajaviŭ ministr kultury Biełarusi Pavieł Łatuška.
— Dyrektar takoha teatra — vielmi surjoznaja i važnaja pasada, — adznačyŭ ministr. — Ja ŭpeŭnieny, što imia novaha dyrektara budzie nazvana ŭ chutkim časie. Ale nijakich kankretnych imionaŭ ja zaraz nazvać nie mahu. U hety čas zahadu ab pryznačeńni novaha kiraŭnika teatra ŭ mianie na stale niama. Ale hetaje pytańnie budzie vyrašana abaviazkova, jość niekalki kandydataŭ — pavinna być kankurencyja.
Namieśnik hienieralnaha dyrektara Nacyjanalnaha akademičnaha Vialikaha teatra opiery i baleta Valeryj Hiedrojc uzhadaŭ i imia byłoha dyrektara teatra Valancina Jelizarjeva.
— Pierad Jelizarjevym dźviery nie začynieny, — raspavioŭ namieśnik dyrektara. — Jon u luby momant moža viarnucca ŭ teatr na pracu. Kali tolki budzie jaho zhoda i zhoda kiraŭnictva. Vy ž nie čakajecie, što my pavinny telefanavać jamu i prasić viarnucca?! Jamu byli zrobleny peŭnyja prapanovy, jon admaŭlajecca ad roznych pasad… U lubym vypadku, jon nie hublaje suviazi s teatram, naviedvaje śpiektakli, daje svaje adznaki. Jon byŭ na adkryćci siezona i stanoŭča adazvaŭsia ab im.
