Da šaści z pałovaj hadoŭ pazbaŭleńnia voli Minskim haradskim sudom prysudžany žychar stalicy. Jon pryznany vinavatym va ŭčynieńni zabojstva ŭ 2003 hodzie.
Jak paviedamiŭ staršy pamočnik prakurora Minska Siarhiej Bałašoŭ, zahinuły — 46-hadovy rabočy CEC-4, jaki zajmaŭsia tym, što pazyčaŭ hrošy pad pracenty. U 2001 hodzie pa dźviuch nataryjalna zavieranych damovach jon pazyčyŭ 1.725 dalaraŭ tady 35-hadovamu vartaŭniku byłoha dziciačaha sadka ŭ Kastryčnickim rajonie. Adnak toj u pryznačany termin całkam hrošy nie viarnuŭ. Kredytor staŭ patrabavać ad daŭžnika vypłacić usiu sumu, ale biezvynikova.
15 maja 2003 hoda dabivacca viartańnia pazyki jon pryjšoŭ na pracu kredytaatrymalnika. Miž imi adbyłasia svarka, jakaja pierarasła ŭ bojku. Vartaŭnik zabiŭ rabočaha niekalkimi ŭdarami siakiery pa hałavie, a trup zakapaŭ u jamie na terytoryi byłoha dziciačaha sadka.
Doŭhi čas rabočy CEC-4 ličyŭsia źnikłym bieź źviestak. Raskryć złačynstva ŭdałosia tolki ŭ 2008 hodzie. Śledstva viałosia prakuraturaj Minska. 43-hadovy minčanin pryznany vinavatym va ŭčynieńni złačynstva, praduhledžanaha č. 1 art. 139 KK. Padčas pryznačeńnia pakarańnia sud uličvaŭ sadziejańnie padsudnaha ŭ rasśledavańni hetaj spravy.
Prysud uvajšoŭ u zakonnuju siłu.
