U homielskim abłasnym Domie dziciaci zahinuŭ trochhadovy chłopčyk. Trahiedyja adbyłasia 12 kastryčnika prykładna ŭ 18 hadzin.
Chłopčyk 2006 hoda naradžeńnia znachodziŭsia z hrupaj dziaciej na prahułcy.
Na jaho nibyta ŭpała šafa, jakaja pa nieviadomaj pryčynie znachodziłasia na terytoryi dvara Doma dziciaci kala haspadarčych pabudoŭ.
Paciarpiełaha dastavili ŭ abłasnuju balnicu, dzie jon pamior.
Prakuratura vyśviatlaje akaličnaści trahiedyi. Pavodle papiarednich źviestak, dzicia pamierła ad traŭmaŭ unutranych orhanaŭ, u tym liku ad razryvu piečani.
Va ŭpraŭleńni achovy zdaroŭja Homielskaha abłvykankama BiełaPAN paviedamili, što dla vyśviatleńnia akaličnaściej zdareńnia stvorana śpiecyjalnaja kamisija, jakaja ciapier pracuje ŭ Domie dziciaci.
Pradstaŭniki administracyi Doma dziciaci situacyju nie kamientujuć.
Varta zaznačyć, što heta nie pieršaja sioleta trahiedyja ŭ homielskim Domie dziciaci. U sakaviku tut pa vinie miedsiastry zahinuła paŭtarahadovaja dziaŭčynka, jaje siastra‑bliźnia atrymała traŭmu.
Ekśpiertyza ŭstanaviła, što dziaŭčynka pamierła ad razryvu piečani i kryvacioku. U jaje siastry była zafiksavana tupaja traŭma žyvata, jakaja stała pryčynaj razryvu piečani i ŭnutranaha kryvacioku. Aprača taho, na ciełach abiedźviuch dziaŭčynak byli vyjaŭleny šmatlikija krovapadcioki roznaha terminu daŭnaści.
Vinavataj va ŭsim hetym była pryznana miedsiastra Doma dziciaci. Za nienaležnaje vykanańnie słužbovych abaviazkaŭ, u vyniku čaho adbyłasia śmierć dziciaci (č. 2 art. 165 KK), i naniasieńnie ciažkich cialesnych paškodžańniaŭ zaviedama małaletniamu (č. 2 art. 147 KK) sud pryhavaryŭ jaje da šaści hadoŭ pazbaŭleńnia voli.