Hałoŭnaj prablemaj realizacyi dziaržaŭnaj Prahramy adnaŭleńnia i raźvićcia vioski, jakoj zajmajecca dziaržpradpryjemstva Biełbyt, zastajecca niasvoječasovaje finansavańnie.
Pra heta zajaviła na pres‑kanfierencyi ŭ Minsku kiraŭnik upraŭleńnia vytvorčaj i techničnaj palityki «Biełbytu» Halina Myćko. Pavodle spadaryni Myćko, sioleta srodki na hety hod pastupili tolki ŭ lipieni, što vyklikała značnaje adstavańnie ŭ realizacyi płanaŭ abjadnańnia.
Siarod inšych prablem realizacyi dziaržaŭnaj prahramy H.Myćko nazvała centralizavanaje vydzialeńnie srodkaŭ, pry jakim hublajecca čas na ich raźmierkavańnie, a taksama adsutnaść kvalifikavanych śpiecyjalistaŭ u sielskaj miascovaści. Astatniaje vyklikana nizkim uzroŭniem zarobkaŭ u śfiery absłuhoŭvańnia. Tolki ŭ niekatorych rajonach, dziakujučy miascovamu dafinansavańniu, udałosia pavysić ich da ŭzroŭniu 650 tys. rubloŭ.
U siarednim ich uzrovień - 450 tysiač.
Dziaržaŭnaja prahrama adnaŭleńnia i raźvićcia vioski praduhledžvaje finansavańnie ŭ pamiery amal 100 młrd rubloŭ na pieryjad 2005—2010. Bolšuju častku finansavańnia pavinny ŭziać na siabie miascovyja biudžety — amal 57 młrd. Praduhledžvajecca taksama finansavańnie z respublikanskaha biudžetu, inavacyjnaha fondu Ministerstva handlu, ułasnych srodkaŭ «Biełbytu», bankaŭskich kredytaŭ i inviestycyj.
Halina Myćko taksama adznačyła, što ŭstanovy bytavoha absłuhoŭvańnia nasielnictva ŭ sielskaj miascovaści ŭ cełym rentabielnyja. Na siońnia dziaržavaj rehulujucca ceny tolki na dva vidy pasłuh — rytualnyja i ramont abutku. Schiema cenaŭtvareńnia na inšyja pasłuhi stała całkam svabodnaj. Što ŭ svaju čarhu dazvoliła pavysić rentabielnaść.
