Varšaŭskaja inicyjatyva «Volnaja Biełaruś» raspačynaje novy prajekt ‑‑ «Čaćvier z kino pa-biełarusku».
Pieršy pakaz adbyŭsia 29 kastryčnika na siadzibie inicyjatyvy (vuł. Koszykowa 10/5). Pra hety prajekt my razmaŭlajem z Maciejem Vilčynskim — sakratarom hramadskaj arhanizacyi «Volnaja Biełaruś».
Jak uźnikła takaja ideja i navošta heta ŭ Varšavie?
MV: U Varšavie jeść šmat ludziej, jakija cikaviacca ŭsim biełaruskim —kulturaj, movaj, muzykaj. Šmat byvaje ludziej na kancertach biełaruskich hurtoŭ. My padumali, što treba prydumać niešta novaje i niejak hetych ludziej zaintryhavać, tak uźnikła ideja zrabić «Čaćviarhi z kino pa-biełarusku».
A jakija jašče prajekty ŭ «Volnaj Biełarusi» u raspracoŭcy, płany na budučyniu?
MV: U najbližejšy čas płanujecca adkryćcio asiarodku, jaki my nazvali «Biełaruski centr» — my chočam sabrać u adnym miescy biełaruskija knižki, muzyku, časopisy, haziety (napeŭna źvierniemsia i da NN, kab dasyłali da nas svaje numary). Kab čałaviek, nievažna ci palak, ci biełarus ci anhličanin, moh pryjści siudy pačytać, pasiadzieć, pasłuchać, papić harbaty, pahavaryć pa-biełarusku.
A jak idzie padrychtoŭka da nastupnaha, užo tradycyjnaha, kancertu «Salidarnaść ź Biełaruśsiu»?
MV: My rabili ŭžo pieršuju arhanizacyjnuju sustreču, pryjšło šmat novych ludziej jakija taksama chočuć dapamahać. Z adnaho boku było šmat palakaŭ — školnikaŭ, studentaŭ, ź inšaha byli i biełaruskija studenty. Pryjšło kala 20 novych asobaŭ. Kankretnaj kancepcyi kancertu pakul niama — jana ŭ raspracoŭcy, ale napeŭna buduć i polskija i biełaruskija hurty. Dalej my padzielimsia na hrupy, kožnaja ź jakich budzie mieć svajo zadańnie. Niechta zajmajecca pijaram, niechta artystami, niechta techničnaj arhanizacyjaj i hd.
Jak by ty zaŭvažyŭ, jak źmianiajecca cikavaść da biełaruskaj tematycy?
MV: Nu kali kazać pa kancertach to na apošni kancert pryjšło mieńš ludziej čym raniej — kala 5 tysiač, ale heta napeŭna tolki z‑za nadvorja. Było vielmi chałodna, uvieś čas jšoŭ doždž. A kali ab sustrečach, to prychodziš na arhanizacyjnuju sustreču i bačyš tam 25‑30 čałaviek, mnie zdajecca, što heta niadrenna. Na apošniuju akcyju 16 vieraśnia pryjšło šmat biełarusaŭ z prahramy Kalinoŭskaha, ahułam taksama było kala 25 čałaviek. Kaniešnie, najbolšy ŭsplesk cikavaści byŭ u 2006, ale nie zaŭsiedy treba vajavać, treba jašče i pracavać.
