Na fota - Paŭluk Kanavalčyk.
Vydaŭcy česna papiaredžvajuć na pieršaj ža staroncy — praźmiernaje ŭžyvańnie piva i čytańnie haziet škodzić zdaroŭju!
«Spadziajusia, što chutka budziem u šapikach», — poŭnicca aptymizmam hałoŭny redaktar Paŭluk Kanavalčyk. Pakul što hazieta budzie vydavacca dvojčy na miesiac i pradavacca praz pryvatnych raspaŭsiudnikaŭ. Nakład «Piŭnoj» 5100 — asobnikaŭ.
Siarod temaŭ numaru — źmieny ŭ Administracyjny kodeks, zaklikanyja zabaranić raśpićcio piva na vulicach, a taksama zabarona prodažu piva ŭ šapikach. «Barak Abama pje piva za ŭručeńnie Nobieleŭskaj premii miru… Anhieła Mierkiel pje piva na «Aktoberfeście»… Uładzimir Pucin pje piva paśla sustrečy ź biełaruskaj delehacyjaj pa hazu… A chto ciapier nalje piva pachmialicca Juryju Šulhanu?! Vierniem piva ŭ kijoski i paviljony!»
Kali ŭśled za stvareńniem haziety jaje vydaŭcy navažacca adnavić dziejnaść Partyi amataraŭ piva, takija zakliki na čarhovych vybarach zmohuć pryciahnuć da ich niemały adsotak prychilnikaŭ.
Jašče kolki zahałoŭkaŭ ź pieršaha numaru haziety: «I Mao Vialiki nam piva naliŭ!..», «Nakacili pa-navukovamu», «Śniahurka «źniałasia» ŭ rekłamie piva ŭ paścielnaj scenie». №1 prapanuje taksama piŭnyja tury pa stalicy — try maršruty, mapa i adrasy minskich piŭnuchaŭ.
«Piŭnaja. Hazieta pra piva i pad piva» afarmleńniem nahadvaje polski «Fakt», źmiestam i charaktaram — «Navinki». Paraleli z apošniaj, mahčyma, uzmocniacca ŭžo ŭ druhim numary, u jakim buduć nadrukavanyja artykuły «Razhuł baraćby za ćviarozaść nabiraje krytyčnyja abaroty», «Tavarystva publičnych ałkaholikaŭ hartuje šerahi dla abarony svaich kanstytucyjnych pravoŭ».
Sajt haziety, na jakim, zhodna aficyjnych dadzienych vydańnia možna znajści dadatkovuju infarmacyju, infarmatyŭnaściu pakul nie moža pachvalicca.
