Byłaja hałoŭnaja redaktarka «Viečiernieho Mohileva» Nadzieja Leŭčanka. Fota: sajt «Majak Prydniaproŭja»
Jak stała viadoma «Našaj Nivie», Leŭčanka syšła na piensiju, ale zastajecca zasnavalnicaj vydańnia i praciahvaje pracavać u im.
Abaviazki hałoŭnaha redaktara vykonvaje Ała Ismahiłava.
Bolš za dziesiać hadoŭ tamu, kali Nadzieja Leŭčanka pačynała karjeru hałoŭnaha redaktara, jana abiacała, što hazieta, nie naviazvajučy svajho mierkavańnia ab padziejach i faktach z žyćcia horada, budzie staracca poŭna, ścisła dy maksimalna apieratyŭna infarmavać ab usim važnym i cikavym, što adbyłosia ci adbudziecca ŭ Mahilovie.
Abiacańni Nadziei Leŭčanki, jakoj budzie «Viečiernij Mohilov». Fota: the-village.me
Adnak usiebiełaruskuju słavu haziecie prynieśli hamafobnyja i antysiemickija artykuły. Jany stali tradycyjnymi dla «Viečiernieho Mohilova», i ich hod ad hodu bolšała.
Spačatku ŭ haziecie stali źjaŭlacca publikacyi antysiemickaj skiravanaści. Na ich mała chto źviartaŭ uvahu. Streliŭ ža artykuł pra viaskovaha transseksuała z Mahiloŭskaha rajona. Było heta ŭ 2015 hodzie.
«Viečiernij Mohilov» tady napisaŭ pra mužčynu, jaki źmianiŭ poł. U artykule jon padavaŭsia ŭ niehatyŭnym śviatle, jaho źmiašali z brudam źniavažlivymi epitetami.
Nadzieja Leŭčanka pryznała, što artykuł napisała jana. Jaho nieabchodnaść tłumačyła imknieńniem raźvivać «narmalnaje zdarovaje hramadstva», a pałochała ŭ im satanoj dla abarony pravasłaŭnych tradycyjaŭ i kaštoŭnaściaŭ.
Paźniej vyśvietliłasia, što Leŭčanka daznałasia pra historyju viaskoŭca ad svajho syna Stanisłava Leŭčanki, jaki byŭ tady sudździoj u sudzie Mahiloŭskaha rajona i vydaŭ maci źviestki pryvatnaha žyćcia abvinavačanaha ŭ kradziažy, jaki ŭtrymlivaŭsia ŭ śledčym izalatary. Sudździu tady pakarali ŭsiaho tolki vymovaju.
«Viadoma, afišavać takija rečy niedapuščalna, tym bolš z ulikam taho, što čałaviek znachodziŭsia pad vartaj. Sudździa ž daŭ intervju, u jakim, chutčej za ŭsio, pa nieaściarožnaści vykazaŭ źviestki intymnaha charaktaru. U jaho praśliznuła ŭsiaho adna fraza, a hazieta zrabiła ŭpor na hetym fakcie, hučna abviaściŭšy, što ŭpieršyniu ŭ Biełarusi pad vartu ŭziali transseksuała…», — vykazvaŭsia pra ŭčynak sudździ Leŭčanki staršynia Viarchoŭnaha sudu Valancin Sukała.
Z sajta hazieta tady prybrała ŭsie źniavažlivyja artykuły pra seks-mianšyni.
Adzin z artykułaŭ «Viečiernieho Mohilova». Žurnalisty vyśvietlili, što pad psieŭdanimam «Viktorija Karpova» piša Nadzieja Leŭčanka. Skryn z haziety «Viečiernij Mohilov»
Paśla toj skandalnaj publikacyi «Viečiernij Mohilov» paniesła. Hamafobnyja artykuły vychodzili adzin za adnym. Hazieta rehularna pisała pra «urodov, kotoryje pridierživajutsia piedierastičieskoj pozicii» i sadamitaŭ.
U 2018 hodzie jana klała ŭ svaim styli čempijanat śvietu pa futbole, jaki prachodziŭ u Rasii. U ananimnaj publikacyi nastojvałasia, što hety vid sportu prydumaŭ djabał.
U 2019-m u dźviuch publikacyjach Respublikanskaja ekśpiertnaja kamisija ŭhledzieła prykmiety ekstremizmu i ŭžyvańnie movy varožaści suprać ŁHBT-supolnaści. U ich byli vykazvańni pabudžalnaha charaktaru z zaklikami da hvałtoŭnych dziejańniaŭ.
Samo vydańnie sudovy praces nazyvała palityčnaj zamovaj z boku «hołuboho łobbi vo vłasti». Na jaho prychodzili pravasłaŭnyja aktyvisty, apranutyja ŭ vajenizavanuju ŭniformu, jakija nie chavali razdražnieńnia samim faktam taho, što na hazietu navažylisia padać u sud.
Hrupa padtrymki «Viečiernieho Mohilova» u sudzie. 2019 hod. Fota: mspring.online
Intaresy «Viečiernieho Mohilova» baraniŭ užo były sudździa Leŭčanka, jaki pracavaŭ u vydańni jurystam. Leninski sud tady nie padtrymaŭ ekśpiertaŭ i pakinuŭ pazoŭ suprać haziety biez zadavalnieńnia. Heta byŭ pieršy ŭ historyi Biełarusi praces za hamafobnyja publikacyi.
Padobnyja artykuły pisalisia i nadalej. «Viečiernij Mohilov» tłumačyŭ ich kłopatam pra «ahulnapryniatyja normy marali» dziela demahrafičnaj biaśpieki Biełarusi, instytutu siamji i abaronaj ich ad «amaralnych i antychryścijanskich zjavaŭ», jakija, maŭlaŭ, padryvajuć asnovy hramadstva i ideałohii dziaržavy.
Były sudździa, a ciapier advakat Stanisłaŭ Leŭčanka. Fota: mediakritika.by
Da sudovaha pracesu ofis «Viečiernij Mohilov» mieŭ u miascovym Domie druku, razam ź dziaržaŭnymi vydańniami. Paśla skandału z hamafobnaj publikacyjaj hazieta źmianiła prapisku i raźmiaściłasia ŭ adnym budynku z mahiloŭskaj mytniaj.
Kali ŭ 2020 hodzie pačalisia pratesty, to «Viečiernij Mohilov» paviedamiŭ pra ich. U adzinaj publikacyi na hetuju temu 19 žniŭnia jon napisaŭ:
«Voś užo niekalki dzion na vulicach, płoščach vialikich i małych haradoŭ kipiać paślavybarčyja straści. Mnohija vybarščyki nie zhodnyja z vynikami hałasavańnia, abvieščanymi Centrvybarkamam Biełarusi, i dla hetaha ŭ ich jość važkija padstavy: internet litaralna strakacieŭ ličbami i faktami manipulacyj kamisij na miescach, jakija falsifikujuć vybary, jakija pavinny byli być sumlennymi, prazrystymi. Adnak vyniki šakavali…»
Publikacyja «Viečiernieho Mohilova» pra prastety 2020 hoda. Fota: the-village.me
Jakoj była reakcyja ŭłady na hetu publikacyju, nie viadoma, ale Leŭčanka zastałasia na pasadzie hałoŭnaha redaktara.
Jaje syn ciapier pracuje advakatam u Minsku. Jaho imia jak člena Minskaj haradskoj kalehii advakataŭ zhadvajecca z kanca 2020 hoda.
U 2019-m na jaho źbiralisia padavać u sud za toje, što padčas adnaho z pasiedžańniaŭ jon nazvaŭ ŁHBT-aktyvista «viadomym p****astam.
Pa vodhukach čytačoŭ, u «Viečiernim Mohilovie» paśla padziej 2020 hoda stała mieniej «ahresiŭnaj leksiki». Ale hazieta praciahvaje šmat pisać pra pravasłaŭje, jaho «zaśmiečvańnie» čužarodnymi elemientami.
Hazieta «Viečiernij Mohilov» — adkrytaje akcyjaniernaje tavarystva. Hazieta vydajecca z 1992 hoda. Jaje zasnavaŭ viadomy ŭ horadzie žurnalist i paśpiachovy miedyjamieniedžar Alaksandr Sančuk. Heta byŭ čas, kali paŭstała niezaležnaja Biełaruś, a ŭ Mahilovie harvykankam uznačalvaŭ prychilnik demakratyčnych pieraŭtvareńniaŭ Siarhiej Habrusieŭ. Miascovy miedyjny rynak byŭ nasyčany hazietami, pa jakija stajali čerhi.
«Viečiernij Mohilov» byŭ «kankurentnazdatnym simpatyčnym vydańniem», zhadvaje jaho kolišni, ale ŭžo były čytač. Jon kaža, što takoj hazieta zastavałasia prykładna da 2013 hoda, a zatym niešta adbyłosia i jaje niby padmianili.
U žurnalisckim asiarodździ kažuć, što heta stała vynikam supracoŭnictva redakcyi z rasijskimi arhanizacyjami, jakija paśla pratestu 2010 hodu stali razrastacca. «Viečiernij Mohilov» pieratvaryŭsia ŭ čarnasociennuju hazietu z absalutnym ihnaravańniem normaŭ žurnalisckaj etyki.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Jano»: jak mahiloŭskaja hazieta zrabiła pačvaraj ścipłaha viaskovaha transseksuała
