U žniŭni 2006 h. u Złučanych Štatach Ameryki raspačnie svaju dziejnaść Centar biełaruskich daśledavańniaŭ. Statutnyja dakumenty ab utvareńni takoha Centru byli padpisanyja 11 lipienia 2006 h. vice-prezydentam Saŭtvestern-koledžu Endry Šepardam (h.Vinfiłd, Kanzas) i byłym ambasadaram ZŠA u Biełarusi Dejvidam Suorcam. Aficyjnaja cyrymonija adkryćcia Centru zaplanavanaja na listapad biahučaha hodu.
Stvareńnie Centru biełaruskich daśledavańniaŭ – heta supolnaja inicyjatyva Saŭtvestern-koledžu i Fundacyi Eŭrapiejskaha Humanitarnaha Ŭniversytetu, jakuju dziesiać hod tamu zasnavaŭ i prezydentam jakoj źjaŭlajecca vypusknik Saŭtvestern-koledžu Ambasadar Suvorc. Metaj Fundacyi była padtrymka EHU, pakul universytet nia byŭ začynieny biełaruskimi ŭładami ŭ 2004 h. Zaraz Fundacyja EHU spyniaje svajo isnavańnie i pieradaje svaju majomaść novaŭtvoranamu Centru biełaruskich daśledavańniaŭ.
Jak paviedamiŭ radyjo Svaboda Ambasadar Suvorc, asnoŭnaj zadačaj Centru budzie adradžeńnie biełaruskaj nacyi praz vyšejšuju adukacyju. Planujecca, što Centar stanie viadučym asiarodkam biełaruskich daśledavańniaŭ u ZŠA, dzie buduć źbiracca daśledčyki, studenty, pradstaŭniki biełaruskaj dyjaspary, a taksama pradstaŭniki dziaržaŭnych i hramadzkich arhanizacyjaŭ, universytetaŭ, biblijatekaŭ, uradaŭ i ŭsie tyja, chto addany spravie pabudovy demakratyčnaj Biełarusi. Centar budzie padtrymlivać navukovyja daśledavańni i inšuju dziejnaść na karyść Biełarusi.
Centar budzie zaprašać daśledčykaŭ i studentaŭ ź Biełarusi i inšych krainaŭ naviedać Saŭtvestern koledž, dzie ŭ ich budzie mahčymaść vieści navukovyja daśledavańni, vystupać ź lekcyjami i sustrakacca ź miascovymi hramadzkimi arhanizacyjami. Užo ŭ hetym miesiacy Centar prymie pieršaha daśledčyka ź Biełarusi, jaki praviadzie ŭ Saŭtvestern koledžy ceły akademičny hod. Biełaruskija studenty atrymajuć mahčymaść prachodzić akademičnyja stažyroŭki na bazie koledža. Centar budzie sadziejničać pašyreńniu viedaŭ pra Biełaruś praz publikacyju navukovych pracaŭ u drukarni koledža. Taksama planujecca, što Centar raspracuje i prapanuje amerykanskim studentam šerah akademičnych kursaŭ, pryśviečanych Biełarusi.
Pa słovach Ambasadara Suorca, Centar zacikaŭleny ŭ supracoŭnictvie z arhanizacyjami i asobami ź Biełarusi, a taksama biełarusami, jakija žyvuć za miažoj. Tak, naprykład, užo adbyłasia sustreča z pradstaŭnikami biełaruskaj dyjaspary ŭ ZŠA, jakija padtrymali ideju stvareńnia Centru. Vitaŭt Kipiel u interviju radyjo Svaboda adznačyŭ, što dyjaspara, u pryvatnaści, dapamoža Centru ŭ stvareńni biełaruskaj biblijateki.
❏
Reakcyja ź biełaruskaj błogasfery:
