Šanoŭnyja delehaty! Darahija hości! Pavažanyja adnadumcy!Biełaruś staić pierad novym etapam svajho raźvićcia. Pierad nacyjaj adkrylisia novyja pierśpiektyvy. Unikalnyja pierśpiektyvy. Niezaležnaje hramadstva pavinna vyznačyć kirunki ruchu i ŭznačalić hety ruch.
Naša nacyja stvaryła dziaržaŭnaść. My nie dapuścili adradžeńnia SSSR. Byli zakładzienyja asnovy kankurentnaj ekanomiki. My nie dapuścili adnaŭleńnia savieckaj sistemy.
Heta ŭsio nie samo saboj zrabiłasia. Za hetym stajać vysiłki tysiač ludziej. Rozum i achviarnaść vas — tych, chto sabraŭsia ŭ hetaj zale.
Za nami była mižnarodnaja salidarnaść. Ale, hałoŭnaje, za nami mahutnaja narodnaja padtrymka. U klučavyja momanty najnoŭšaj historyi, kali stajała pytańnie pra niezaležnaść, biełaruskaja nacyja vyjaŭlała svaju volu na vulicach.U 1991 hodzie, paśla ŭ 1996-m, u 1999-m i ŭ 2006-m dziesiatki tysiač ludziej pakazali, za što jany. Naša nacyja ŭśviadomiła: pry patrebie masava vychodzić na vulicy.
Pa miery taho, jak ludzi atrasajuć ź siabie strach, tatalnuju zaležnaść ad ułady, pa miery taho, jak jany znajomiacca z žyćciom inšych krain, z prychodam internetu amal ŭ kožnuju chatu, palityčnyja pavodziny hramadzian buduć taksama mianiacca.
Z kožnym hodam biełarusy buduć patrabavać bolšaha kantrolu nad uładaj, bolšych pravoŭ i svabod, bolšaj pavahi da siabie i svajho nacyjanalnaha «ja». My budziem padtrymlivać ludziej u hetych patrabavańniach. My pavinny nadać hetamu ruchu arhanizacyjnuju formu.Treba zrabić tak, kab nacyja narešcie skazała svajo vyrašalnaje słova. I jana jaho skaža.
Nacyi treba dać aryjencir — kudy my prapanujem krainie ruchacca?Naš adkaz prosty: Biełaruś — u Jeŭropu!
Tut, u Jeŭropie, jašče ŭ ChVIII stahodździ była ŭpieršyniu sfarmulavanaja dumka ab roŭnaści ŭsich ludziej pierad Boham i pierad Zakonam. Tut Orueł i Popier pastavili dyjahnaz tatalitarnym dziaržavam, jakija źniščajuć asobu. Tut vusnami Jana Paŭła II byli skazany vysokija słovy ab niedapuščalnaści relihijnaha i palityčnaha ekstremizmu i pryhniotu.
Saviety razarvali suviazi biełarusaŭ ź Jeŭropaj. Adnak za apošnija hady miljonami tonkich nitačak iznoŭ našy losy pačali źviazvacca.Biełarusy znoŭ pačali paraŭnoŭvać siabie ź jeŭrapiejcami.
Paśla Čarnobyla bolš za miljon dziaciej pabyvali ŭ Jeŭropie na azdaraŭleńni. Jany znajšli tam ciapło i siabroŭ. My ščyra ŭdziačnyja ŭsim tym jeŭrapiejcam, jakija pamahali našym dzietkam.
200 tysiač vieteranaŭ vajny i vyviezienych na prymusovyja pracy atrymali dapamohu pa linii fondu «Ŭzajemarazumieńnie i prymireńnie». Hetyja hrošy, kaniečnie, ništo ŭ paraŭnańni z pakutami naroda ŭ vajnu, ale važnyja jak znak, jak ruka družby.
Našy piensijaniery ŭžo taksama viedajuć, što možna žyć inakš. Siońnia siaredniaja piensija ŭ Biełarusi składaje 150 dołaraŭ ZŠA, a ŭ susiedniaj Polščy — 500 jeŭra.
Prycharošanaja statystyka chavaje realny stan biełaruskaj ekanomiki. A mnohija ž ludzi biadujuć. Staŭka miedsiastry — 450 tysiač. Rabočy lnozavoda — 300 tysiač. Nastaŭnik, asnova hramadstva — 500 tysiač.
Bolš za 600 tysiač čałaviek štohod nielehalna pracuje za miežami Biełarusi. Ź ich 200 tysiač — u Jeŭrapiejskim Sajuzie.
Niama aficyjnaj statystyki, kolki maładych hramadzian našaj krainy atrymlivajuć adukacyju za jaje miežami, bo nie mohuć samarealizavacca ŭ Biełarusi. Ich tysiačy. Na žal, mnohija ź ich źjazdžajuć, kab nie viarnucca. My hublajem patencyjał nacyi.
Pahladzim na vyniki sacyjałahičnych apytańniaŭ. Kožny treci biełarus padtrymlivaje ideju ŭvachodžańnia krainy ŭ Jeŭrasajuz. I tolki try pracenty — u skład Rasijskaj Fiederacyi.
Značyć, biełarusy chočuć žyć, jak jeŭrapiejski narod.
Stahodździami my pracavali razam z ukraincami, palakami, litoŭcami, razam baranili svaje svabody, miežy i ekanamičnyja intaresy. A ciapier palaki i litoŭcy pajšli napierad, u adkrytuju prastoru Vialikaj Jeŭropy ź jaje vialikimi mahčymaściami — a my?
Čamu hetyja narody prajšli svoj šlach, a my zatrymalisia? Pra heta treba spytać u ułady.
Ja chaču padkreślić nierazryŭnaść troch elemientaŭ. Biez prava na svabodny vybar, biez raźniavoleńnia hramadzianaŭ na ŭsich uzroŭniach my nie zmožam zaniać raŭnapraŭnaje miesca siarod jeŭrapiejskich dziaržaŭ. U toj ža čas tolki intehracyja Biełarusi ŭ Jeŭropu zdolnaja zabiaśpiečyć paŭnavartaje ekanamičnaje raźvićcio, jakoha my chočam. I tolki intehracyja ŭ Jeŭropu zdolnaja harantavać biaśpieku našaj krainy.
Pierachodny pieryjad moža być. Ale ŭ cełym, kali ścisła: biez svabody i demakratyi nie budzie jeŭraintehracyi. Bieź jeŭraintehracyi nie budzie dabrabytu i abaronienaści.
My ad ES nikudy nie dzieniemsia, majučy jaho na troch miežach. Prosta
ci my budziem pobač ES, ci ŭ składzie ES. Realnaść žorstkaja. Chto zastaniecca za ŭschodniaj miažoj abjadnanaj Jeŭropy, zastaniecca syravinnym dadatkam da Jeŭraźviaza. Budzie bienzinavym šłanham, hruba kažučy. Chto budzie siabram ES, budzie jak unutry sučasnaj mašyny.
Havoračy pra značeńnie intehracyi ź ES dla abaronienaści, ja razumieju jak ŭnutrany pravaparadak, tak i zamiežnapalityčnaje zabieśpiačeńnie spakojnaha žyćcia.
Umacavańnie demakratyi nie aznačaje asłableńnie zakonnaści i pravaparadku.Naadvarot, pravaparadak u jeŭrapiejskich krainach padtrymlivajecca na najvyšejšym uzroŭni. Aficery vojskaŭ, milicyi i śpiecsłužbaŭ u jeŭrapiejskich krainach zarablajuć našmat bolš, čym ich biełaruskija kalehi. I ŭpeŭnienaść, jakaść ich žyćcia nieparaŭnalnaja. Raschody na abaronu, raschody na dziejnaść strukturaŭ achovy paradku ŭ Biełarusi treba pryvodzić da jeŭrapiejskich standartaŭ. Heta adzin z klučoŭ da demakratyčnaj evalucyi.
Svaboda budzie vyhadnaja ŭsim, navat tym, chto jaje ciapier baicca i zmahajecca suprać jaje.Zarabić na hodnaje žyćcio možna, i nie pradajučy svabodu!
Ci aznačaje naš aryjencir na Jeŭropu toje, što my prapanoŭvajem inšy varyjant samaizalacyi? Na škodu našym kantaktam z našym stratehičnym partnioram Rasijaj? Nie! Biełaruś pavinna być adkrytaj dla šyrokaha zamiežnapalityčnaha dyjałoha ź luboj krainaj śvietu ź luboha rehijonu. Heta naturalnaje prava svabodnaj suvierennaj demakratyčnaj dziaržavy.
Tolki bahataja, ekanamična raźvitaja Biełaruś zmoža zabiaśpiečyć sabie niezaležnaść. Voś čamu my budziem padtrymlivać kroki dziejučaha biełaruskaha ŭrada pa pryviadzieńni ekanomiki da jeŭrapiejskich standartaŭ.Adnačasova my budziem ćviorda zmahacca z režymam za kožny łapik svabody. Nie moža być ustojlivaha raźvićcia biez svabody.
Budučynia biełaruskaj ekanomiki — u praryvie na rynak ES. Nievypadkova ministerstvy stali ŭ čarhu pa jeŭrapiejskija inviestycyi, a Nacbank hatovy pakorna prytrymlivacca rekamiendacyj Mižnarodnaha valutnaha fondu, jaki ŭčora jašče byŭ anafiemaj.
Kryzis padšturchnuŭ kiraŭnictva krainy da Jeŭropy — ale nie da demakratyi. Biełaruś jašče nie zrabiła hałoŭnaha kroku nasustrač Jeŭropie — pieramienaŭ u palityčnaj sistemie.
Niadaŭna na biełaruska-niamieckim forumie Uładzimir Makiej skazaŭ: što «ŭpeŭnienyja kroki pavinny rabicca niaśpiešna». Nibyta i našy prodki ŭ svoj čas padobna farmulavali asnovu biełaruskaha kansiervatyzmu: «Staryny nie rušyć, naviny nie ŭvodzić». Adnak jość adzin niuans. Hetaja formuła — «Staryny nie rušyć, naviny nie ŭvodzić» — adnosiłasia da zachavańnia starych volnaściaŭ i pravoŭ. Jaje zhadvali, kali ŭźnikała pahroza tyranii.
Pieražytki savietčyny treba likvidavać rašuča. Kab Biełaruś uvajšła ŭ Jeŭrasajuz, kab Biełaruś pieratvaryłasia ŭ technałahična i sacyjalna pieradavuju krainu, patrebna vola da pieramienaŭ.
Paplečniki maje! Adnadumcy! My majem takuju volu.
Naša vialikaje dasiahnieńnie, što my zhurtavalisia ŭ adzin Biełaruski Niezaležnicki Błok,bo niezaležnaść dla nas absalutnaja kaštoŭnaść.
Ruch za Svabodu budzie ruchavikom pieramienaŭ i płatformaj dla dyjałohu z hramadstvam.
Narodny Front prynios vialikuju tradycyju palityčnaj baraćby i biełaruskaha adradžeńnia.
Chryścijanskaja Demakratyja ŭmacoŭvaje pavahu da ahulnačałaviečych i siamiejnych kaštoŭnaściaŭ.
«Małady front» vytrymaŭ samyja surovyja represii. Ad jaho ŭ nas budzie niazłomnaść.
I «Pravy aljans» daje zahartoŭku ducha.
«Maładaja Biełaruś» i Maładyja demakraty» samoj nazvaj mabilizujuć.
Ruch salidarnaści «Razam» budzie spryjać samaarhanizacyi tych, kamu jość što abaraniać.
Heta jašče nie ŭsie. Inšyja dałučacca, kali pabačać našy pryncypy. My čakajem vas. My abaviazany być razam!
Ciapier pra adnosiny Jeŭrasajuza i našaj krainy.
Kali my bačym, što ŭ čymści jość nacyjanalny intares, my pavinny jaho ŭparta adstojvać.Pryviadu prykład ź niadaŭniaj historyi. Jašče 10 hadoŭ nazad bolšaść hramadzian vystupała za adnaŭleńnie SSSR. Hetaja bolšaść pamylałasia. Jana vystupała za stvareńnie hibielnaje dla budučyni biełaruskaje ekanomiki, hibielnaje dla biełaruskaje identyčnaści sajuznaje dziaržavy z Rasijaj. My adkryta vystupali suprać. My nie dapuścili adnaŭleńnia SSSR. Prajšło 10 hadoŭ. Chto ciapier z nami nie pahodzicca? Usie pahadžajucca. Nie budziem ža bajacca adstojvać stratehična važnyja dla nacyi rašeńni i zaraz.
Palityka izalacyi režymu nie apraŭdała siabie. Izalujuć režym, ale kali izalacyja doŭhaja, to ŭ vyniku ŭ jaje traplaje narod.My — kateharyčna suprać hetaha. Luboje pašyreńnie kantaktaŭ ź Jeŭropaj idzie ŭ doŭhačasavym płanie na karyść. A izalacyja nie pakidaje režymu vybaru i kidaje nas u poŭnuju zaležnaść ad Rasii.
Naša meta — damahčysia niezvarotnych pieramienaŭ nie tolki ŭ ekanamičnym kursie Biełarusi, ale i ŭ dziejnaści ŭsich dziaržaŭnych instytutaŭ. Z takimi kryterami my padychodzim i da pazicyi našych jeŭrapiejskich partnioraŭ u ich dyjałohu z aficyjnym Minskam.
Ciapier pra vybary.
Na lubych sumlennych vybarach my pieramahli b. Na lubych.
Ale dla realizacyi prava na vybary treba zmahacca. Treba paśladoŭna vykarystoŭvać kožnuju mahčymaść dla razmovy ź ludźmi. Treba dabivacca pieramienaŭ u śviadomaści.
Tamu
ja — praciŭnik bajkotaŭ. Va ŭmovach aŭtarytarnaha režyma pasiŭny niaŭdzieł pavyšaje šansy na pryznańnie vybaraŭ lehitymnymi.Razumiejučy ŭsie isnujučyja prablemy z vybarami, realnymi paŭnamoctvami miascovych deputataŭ, ja hłyboka pierakanany, što miascovyja vybary ni ŭ jakim vypadku nielha ihnaravać. U spałučeńni z vostrymi łakalnymi prablemami taho ci inšaha rehijona našymi łozunhami na vybary zastajucca «Niezaležnaść! Demakratyja! Jeŭrapiejskaść!»
My abaraniali kožnaha, chto paciarpieŭ u baraćbie. My arhanizavali navučańnie dla represavanych studentaŭ. My dali dapamohu paciarpiełym. My ładzili kancerty zabaronienych muzykaŭ. Zapracavali «Biełsat» i novyja radyjostancyi. Tam, dzie ŭłady začyniali haziety, my adkryvali internet-sajty. My ŭ mieru našych mahčymaściaŭ dapamahali kožnaj sprobie ludziej samaarhanizavacca. U nas nie było na toje vialikich hrošaj. Zatoje była salidarnaść.
Ja asabista imknuŭsia nie prapuścić nivodnaha suda. Ja pabyvaŭ u vaśmidziesiaci haradach Biełarusi.
Heta daje mnie maralnaje prava być lideram niezaležnaha hramadstva i ja im budu niezaležna ad vybaraŭ.
Usio toje, što my rabili, my budziem rabić da pieramohi.
Udzieł u prezidenckaj honcy dla mianie i dla nas nie samameta. Kali źjavicca realny kandydat, zdolny pierakanać u svajoj ščyraści i svajoj prahramie ŭsio hramadstva, zdolny abjadnać vakoł siabie realna isnujučyja demakratyčnyja siły — heta značyć, demakratyčny rehijanalny aktyŭ pierš za ŭsio, a nie tolki staličnuju tusoŭku — my i ja padtrymajem takoha kandydata i budziem pracavać ź im u toj jakaści, u jakoj spatrebicca.
Kali na vybary pojdziem, pojdziem dla pieramohi. U 2006-m było piakielna ciažka, i to pracavali na pieramohu. Tady my pieramahli strach. Takoha strachu, jaki byŭ pierad Płoščaj, bolš nie budzie. U 2011-m budzie lahčej. Režym asłab. Jaho padtačyła erozija. Tyja, chto raniej režym budavali, ciapier sami zrazumieli: sistemu para mianiać.
My nie dapuścili razvału i dezarhanizacyi apazicyi, kali lidery sychodzili adrazu paśla vybaraŭ ci źjazdžali za miažu.Ja, Milinkievič, tut, z vami. Ja prajšoŭ z vami ŭvieś šlach. Z vami byŭ na Płoščy ŭ 2006-m. Z vami siadzieŭ u turmie na Akreścina.
Ale davajcie nie absalutyzavać asobu. Davajcie absalutyzavać supolnaść. Našu hramadzianskuju supolnaść.
Davieryć nacyja niezaležnamu hramadstvu pryvieści Biełaruś u Jeŭrasajuz — davieryć i Milinkieviču.
Ja zdolny pryvieści Biełaruś u Jeŭrasajuz.
Ja budu rychtavacca da vybaraŭ. My, Biełaruski Niezaležnicki Błok, budziem da ich hatovyja. Pavinna być ahučanaja jasnaja alternatyva ciapierašniamu aŭtarytarnamu kursu. Heta — svabodnaja, demakratyčnaja, jeŭrapiejskaja Biełaruś. Jeŭrapiejskaja ŭ štodzionnaj realnaści. Taja, za jakuju my hatovyja zmahacca. Jakuju my chočam pakinuć našym dzieciam.
My vypravim hetuju trahiedyju nacyjanalnaj historyi, što Biełaruś była vyrvanaja ź jeŭrapiejskaha kantekstu.
Biełaruś stanie kvitniejučaj jeŭrapiejskaj krainaj.
Ja hladžu ŭ vašy vočy i baču: stanie.
Biełaruś u Jeŭropu! Žyvie Biełaruś!
