Dakumientalny film «Efiekt Mirnaha» pra biełaruskaha tenisista Maksima Mirnaha pradstaŭleny žurnalistam u Minsku 17 listapada. Demanstracyja stužki praciahłaściu adna hadzina adbyłasia ŭ restaranie Coffee Inn, jaki naležyć spartsmienu.
Režysior filma Alaksandr Patapaŭ i aŭtar scenaryja Mironika Mart ličać film «liryčnaj odaj pośpiechu». Tenisist i jaho baćka i trenier Mikałaj Mirny raskazvajuć pra pieršyja kroki ŭ sporcie, pieršyja hrošy, pieršyja pośpiechi, staŭleńnie da žyćcia, siamju i volny čas. Pavodle słoŭ Mikałaja Mirnaha, ideja stvaryć film uźnikła ŭ sakaviku 2007 hoda, na bankiecie paśla zakančeńnia konkursu «Televiaršynia». Było vyrašana zrabić «surjozny film» pra Maksima «nie jak pra tenisista i spartsmiena, a jak pra čałavieka i parachoda».
Pra Maksima Mirnaha ŭ filmie raskazvajuć jaho kalehi Raže Fiederer, Rafael Nadal, Uładzimir Vałčkoŭ, Hanna Kurnikava, Viktoryja Azaranka, Marat Safin, Majk Brajan, a taksama Ryčard Uiljams — baćka siaścior Siereny i Vienus Uiljams.
Intervjujeram niaredka vystupaŭ Mikałaj Mirny, jaki, adnak, nie zachacieŭ, kab jaho pakazvali ŭ kadry ź mikrafonam.
«Ja realizavaŭ toje, što ŭ mianie ŭkłali mnohija ludzi — maci, baćka, treniery, byłyja i ciapierašnija kalehi», — havoryć u filmie Maksim Mirny. Mikałaj Mirny nazvaŭ siabie «samym ščaślivym baćkam». «Taki adrenalin, stolki murašak vypadaje na ciele, kali bačyš, jak tvoj syn padymajecca na pjedestał. Dziela takich momantaŭ varta žyć», — skazaŭ Mikałaj Mirny.
Stvaralniki filma sprabavali taksama sabrać niehatyŭnyja mierkavańni ab tenisiście, ale heta im praktyčna nie ŭdałosia. Na prośbu vykazać niehatyŭ adhuknuŭsia ahient Mirnaha Maks Ajzienbad, jaki nazvaŭ spartsmiena «stremkaj u zadnicy», kali paśla niaŭdač Maksim pačynaje «kapać na mazhi».
Mikałaj Mirny nazvany ŭ filmie «svarlivym i zapalčyvym». Niekalki razoŭ tandem baćki i syna byŭ «na miažy razryvu». Baćka tenisista zapeŭniŭ, što chutka nie budzie «terarystam u domie».
Svaim hałoŭnym žadańniem Maksim Mirny nazvaŭ być doma ź siamjoj. «Na praciahu 25 apošnich hadoŭ ja nikoli nie byŭ doma bolš za miesiac», — adznačyŭ 32-hadovy spartsmien. Siabie jon ličyć kamandnym hulcom.
«Kali b u mianie była mahčymaść vybirać, ja b, napeŭna, staŭ futbolnym varatarom», — skazaŭ Mirny.
Film «Efiekt Mirnaha» płanujecca pakazać na telekanale ONT u pačatku śniežnia, paśla viartańnia spartsmiena i jaho baćki z vynikovaha turniru ŭ Łondanie. Stužku płanujecca pradstavić na konkursie «Televiaršynia».
