Delehacyja Pałaty pradstaŭnikoŭ Nacyjanalnaha schodu Biełarusi 19 listapada sustrełasia z kiraŭnikom Abchazii Siarhiejem Bahapšam, paviedamlaje pres‑słužba abchazskaha prezidenta.
Pavodle słoŭ Bahapša, Abchaziju i Biełaruś źviazvaje daŭniaja družba. «A pavodziny kiraŭnika Biełarusi padčas abjaŭleńnia Abchazii ekanamičnaj błakady ŭ pamiaci naroda i kiraŭnictva zastalisia nazaŭždy», — skazaŭ jon.
Bahapš padkreśliŭ, što Abchazija «budzie vieści dyjałoh z usimi, chto žadaje ź joj razmaŭlać». «Ale my nie źbirajemsia nikoha ŭprošvać, vystaŭlać niejkija patrabavańni, kab chtości pryznaŭ našu niezaležnaść, — zajaviŭ prezident. — Ja nieadnarazova i Alaksandru Łukašenku havaryŭ pra heta, i pra toje, što tyja, chto byŭ nam blizki ŭ ciažkija dla nas časy, takimi i zastanucca. A jak budzie iści praces pryznańnia niezaležnaści Abchazii, pakaža čas. My razumiejem, što ŭ hetym składanym śviecie nie ŭsio dajecca vielmi prosta».
Pavodle słoŭ Bahapša, pry lubym varyjancie raźvićcia padziej «Abchazija viedaje, što ŭ jaje jość siabry i krainy, ź jakimi jana chacieła b źviazać svoj los». «Heta Rasija, Biełaruś i jašče niekalki krain», — udakładniŭ jon.
U svaju čarhu, staršynia kamisii Pałaty pradstaŭnikoŭ pa prablemach čarnobylskaj katastrofy, ekałohii i pryrodakarystańni Michaił Rusy vykazaŭ padziaku kiraŭnictvu krainy za mahčymaść ubačyć poŭnuju karcinu padziej ŭ Abchazii.
«My naviedali parłamient Abchazii, sustrelisia sa śpikieram i kiraŭnikami kamitetaŭ Narodnaha schodu, adbyłasia vielmi cikavaja i hruntoŭnaja razmova va ŭradzie.
My atrymali vialikaje zadavalnieńnie ad sustrečy ź ministram zamiežnych spraŭ Siarhiejem Šambam, i atrymanyja ŭ źniešniepalityčnym viedamstvie dakumienty dapamohuć u padviadzieńni vynikaŭ našaha vizitu. Na sustrečy ź ministram abarony Abchazii nam rastłumačyli šmat detalaŭ, jakija dla nas byli vielmi važnyja», — skazaŭ jon.
Jak raniej paviedamlałasia, z 17 pa 20 listapada delehacyja Pałaty pradstaŭnikoŭ i Savieta Respubliki naviedvaje Hruziju, Abchaziju i Paŭdniovuju Asieciju.
Rašeńniem Savieta Pałaty pradstaŭnikoŭ ad 5 listapada 2009 hoda była stvorana pracoŭnaja hrupa z pradstaŭnikoŭ dźviuch pałat parłamienta «z metaj atrymańnia dadatkovaj infarmacyi ab pytańni pryznańnia niezaležnaści Abchazii i Paŭdniovaj Asiecii, a taksama vypracoŭki rekamiendacyj dla razhladu hetaha pytańnia Pałataj pradstaŭnikoŭ».
Rasija pryznała niezaležnaść respublik u kancy žniŭnia 2008 hoda. Hruzija ŭ adkaz na heta razarvała dypłamatyčnyja adnosiny z RF i abjaviła Abchaziju i Paŭdniovuju Asieciju akupavanymi terytoryjami. Akramia Rasijskaj Fiederacyi niezaležnaść respublik pryznała Nikarahua. 10 vieraśnia 2009 hoda padčas vizitu ŭ Maskvu prezident Vieniesueły Uha Čavies zajaviŭ, što jaho kraina pryznaje niezaležnaść Abchazii i Paŭdniovaj Asiecii.
Adozvy Abchazii i Paŭdniovaj Asiecii z prośbaj pryznać ich niezaležnaść pastupili ŭ biełaruski parłamient u kancy 2008 hoda; parłamienckija kamisii ich vyvučajuć.
