14-hadovy vunderkind Kajren Kvazi. Fota: instahram Kajrena Kvazi, @thepythonkairan
14-hadovy chłopčyk Kajren Kvazi byŭ aficyjna pryniaty na pracu ŭ kampaniju SpaceX Iłana Maska ŭ jakaści stvaralnika prahramnaha zabieśpiačeńnia dla internet-spadarožnikaŭ Starlink. Pra heta chłopčyk napisaŭ na svajoj staroncy ŭ Linkedln 9 maja.
Kajren žyvie ŭ Kalifornii i ŭ svaje hady paśpieŭ užo nie tolki skončyć univiersitet, ale i paśpiachova prajści stažyroŭku ŭ takich bujnych kampanijach, jak Intel i Blackbird.AI. Akramia hetaha, Kajren uvachodzić u śpis samych intelektualna raźvitych ludziej płaniety z uzroŭniem IQ vyšejšym za 99,9%.
Chłopiec vielmi ŭzradavaŭsia svajmu pryjomu na aficyjnuju pracu ŭ SpaceX, bo «heta adna ź niamnohich kampanij, jakaja nie ličyć uzrost adzinym pakazčykam uzroŭniu stałaści i zdolnaściaŭ».
«Ja dałučusia da samaj krutoj kampanii na płaniecie ŭ jakaści raspracoŭščyka prahramnaha zabieśpiačeńnia ŭ inžyniernaj kamandzie Starlink. SpaceX adna ź niamnohich kampanij, jakaja nie ŭsprymaje moj uzrost jak adziny pakazčyk majoj stałaści i zdolnaściaŭ. Ja ŭdziačny ŭsim maim nastaŭnikam, baćkam i siabram, jakija ŭkłalisia ŭ majo raźvićcio», — napisaŭ Kajren Kvazi na svajoj staroncy ŭ LinkedIn.
Charakterna, što z pazicyi fiederalnaha zakanadaŭstva ZŠA takoje pracaŭładkavańnie 14-hadovaha dziciaci nie supraćzakonnaje, bo intelektualnaja i tvorčaja zaniataść, nie źviazanaja ź fizičnaj pracaj siaredniaha i vysokaha ŭzroŭniu składanaści, dazvolenaja dla ludziej niepaŭnaletniaha ŭzrostu ŭžo z 14-15 hadoŭ.
Pry hetym zvyčajna pracoŭnyja hadziny ŭ hetym vypadku surjozna abmiežavanyja dla niedapuščeńnia pierahruzki abo naniasieńnia škody zdaroŭju dziciaci, asabliva kali toje chodzić u navučalnyja ŭstanovy.
Ale jość i redkija vyklučeńni ŭ vypadku aficyjnaha zakančeńnia dziciem navučańnia ŭ škole ci va ŭniviersitecie.
Čytajcie taksama:
Ustań i idzi. Kampanija Iłana Maska pačnie vyprabavańni mazhavych impłantaŭ na ludziach
Navukoŭcam upieršyniu ŭdałosia pieradać enierhiju z kosmasu na Ziamlu
Pahladzicie na piakielnuju «pryładu dezaryjentacyi», z dapamohaj jakoj rychtujuć astranaŭtaŭ NASA
