U Biełarusi pa stanie na 19 listapada virus hrypu A (H1N1) vyjaŭleny ŭ 13 čałaviek, jakija pamierli ad pnieŭmanii, paviedamili ŭ Ministerstvie achovy zdaroŭja. Va ŭsich hetych ludziej była źmiešanaja infiekcyja.
Zaraz daśledujucca pracentnyja suadnosiny virusu hrypu A (H1N1) da inšych, jakija byli ŭ arhaniźmie pamierłych.
Usiaho ŭ krainie zarehistravana 165 vypadkaŭ zachvorvańnia na pandemičny hryp A (H1N1), u tym liku za čas epidemičnaha ŭzdymu zachvorvańnia — 139 vypadkaŭ(0,02% ahulnaj kolkaści zachvarełych na VRVI). Takaja kolkaść vypadkaŭ zachvorvańnia była zarehistravana i na 16 listapada. Zhodna z aficyjnymi źviestkami (na 4 listapada), z 19 kastryčnika, pačatku ŭzdymu zachvorvańnia,
ad pnieŭmanii ŭ Biełarusi pamierli 19 čałaviek, u siami ź ich łabaratornyja daśledavańni paćvierdzili najaŭnaść virusu hrypu A (H1N1).
U Ministerstvie achovy zdaroŭja zaznačyli, što adsutnaść dynamiki ŭ vyjaŭleńni vypadkaŭ śvinoha hrypu źviazana z tym, što ŭsie vypadki hrypu A (H1N1) nie majuć patreby ŭ łabaratornym paćviardžeńni, bo pryncypy lačeńnia ŭsich form hrypu adnolkavyja. Na najaŭnaść virusu A (H1N1) praviarajuć tolki chvorych, hryp u jakich prachodzić u ciažkaj formie.
Kolkaść zvarotaŭ pa miedycynskuju dapamohu nakont VRVI značna źniziłasia, padkreślili ŭ Ministerstvie achovy zdaroŭja. U niekatorych kantrolnych haradach nazirajecca źnižeńnie epidemijałahičnaha ŭzroŭniu.
Pavodle infarmacyi Ministerstva achovy zdaroŭja, na 16 listapada adznačana źnižeńnie ŭzroŭniu zachvorvańnia va ŭsich rehijonach krainy i ŭ stalicy.
Pavodle źviestak sansłužby Minska, za tydzień z 9 pa 15 listapada na hryp i VRI ŭ stalicy zachvareli 49.227 čałaviek, a z 2 pa 8 listapada — 64.669 čałaviek. Pik zachvorvańnia prypaŭ na 2 listapada, kali da miedykaŭ ź simptomami hrypu i VRI źviarnulisia 14.333 čałavieki. Dla paraŭnańnia, 9 listapada zachvarełych na VRI i hryp było 12.175 čałaviek. U aŭtorak, 17 listapada, da miedykaŭ nakont hrypu i VRI ŭ stalicy źviarnulisia 6.469, u sieradu, 18 listapada, — 5.494, u čaćvier, 19 listapada, — 5.002 čałavieki.
Vakcynacyja ŭ Budapiešcie, fota daylife.com
