U vioscy Rakšycy (Vilejski rajon Minskaj vobłaści) nočču 18 listapada hareŭ žyły dom. Jak vyśvietlili vyratavalniki, padpaliŭ jaho 45‑hadovy mužčyna, jaki pakutuje na psichičnaje zachvorvańnie.
Mužčyna žyŭ razam sa svajoj maci ŭ jaje domie, raskazaŭ inśpiektar dziaržaŭnaha pažarnaha nahladu rajadździeła pa nadzvyčajnych situacyjach Aleh Hrynievič. Sa słoŭ maci, jaje syn psichična niezdarovy. Hadoŭ šeść tamu jon spaliŭ svoj ułasny dom.
Žančyna raskazvała taksama, što 16 i 17 listapada padčas abvastreńnia chvaroby syn vyryvaŭ šłanh hazavaha bałona, adkryvaŭ u im kran i padnosiŭ zapałku.
Maci tady nie vyklikała vyratavalnikaŭ, razam z susiedziami joj udavałasia spravicca z synam.
U noč na 18 listapada žančyna nie ryzyknuła načavać doma, pajšła da susiedziaŭ. A syn usio ž ździejśniŭ svaju zadumu. Paviedamleńnie pra ŭzharańnie vyratavalnikam pastupiła ŭ 2 hadziny 36 chvilin.
Pavodle słovaŭ Aleha Hrynieviča, ačah pažaru znachodziŭsia ŭ žyłym pakoi. Ad draŭlanaha doma ź biarvieńnia pamieram 6 na 13 mietraŭ zastalisia tolki ścieny. Žyć u im užo niemahčyma. Haspadyni zharełaha doma ciapier pryjdziecca pierajechać da adnoj z troch svaich dačok.
Padpalščyk na pažary nie paciarpieŭ.
Chvoraha, jaho advieźli ŭ reanimacyjnaje adździaleńnie balnicy. Materyjały pa zdareńni vyratavalniki pieradali ŭ rajadździeł milicyi.
