Dva hady my nie pisali pra spravy suajčyńnikaŭ, jakija znachodziać asałodu ŭ abkružeńni čužych fišak. Miž tym prychilniki «pryhožaha ciačeńnia kamianioŭ» (tak hučyć pažadańnie pośpiechu ŭ hulni ho, jana ž baduk, jana ž vej-čy) aktyvizavalisia i ŭ virtualnaj prastory, i ŭ «ofłajnie». Jany adkryli internet-staronku, ź jakoj luby achvotny moža navučycca praviłaŭ ho. Tamsama – zachaplalny apovied pra toje, jak biełaruski čempijon Alaksandar Suponieŭ zmahaŭsia z pradstaŭnikami Francyi i Manholii na 27-m Čempijanacie śvietu siarod amataraŭ u Saseba la Nahasaki. Nabraŭ jon usiaho try bały ŭ vaśmi turach, zatoje paznajomiŭsia z majstrami, paŭdzielničaŭ u kanhresie IGF – suśvietnaj federacyi ho.
«Klub intelektualnych hulniaŭ Uschodu» pry BDU atrymaŭ novuju nazvu «Sad kamianioŭ», što adrazu zavabiła navabrancaŭ. U čas vakacyjaŭ źbiracca aficyjna hošnikam niama dzie, i jany vybrali dla mižsobnych batalijaŭ… mansardu handlovaha domu «Niamiha». Choć «u hetym hodzie na Niamizie kiepska – zašmat pjanych maładzionaŭ», jak sa skruchaj adciemiŭ naviednik sajtu igo.jino-net.ru.
Znajšoŭsia j amatar, niazhodny z tym, što praviły hulni vykładajucca adno na movie susiedniaj dziaržavy. Palašuk pad nikam «Symonka Sałaviejka» samachoć pierakłaŭ padručnik ho Chiroki Mory na biełaruskuju. Takim čynam, jana stała 26-j movaj śvietu, na jakoj mažliva acanić dasiahnieńni japonskich prafesijanałaŭ.
Na forumie biełaruskich vejčystaŭ sp.Suponieŭ raskazaŭ pra paciešnuju niespadziavanku. Jon hulaŭ u pary ź japonskimi amatarkami suprać inšych haściej, dyk vyjaviłasia, što jaho partnerki, jakija vałodali tolki japonskaj, nia mieli žadnaha paniaćcia pra Biełaruś. Jamu davodziłasia tłumačyć niešta nakštałt: «voś Rasieja, voś Polšča, a voś pamiž imi – my». Kab ža hetkija tłumačeńni zrabilisia, urešcie, zališnimi…
❏
❏
Jak by vy zhulali?
Z.Łybin – M.Pankoŭ. Seans adnačasovaj hulni ŭ «NN», Miensk, 2006.
Adkaz: 1. Sg6! fg 2. Tg6+ hg 3. Fg6+ Kph8 4. 0-0-0 Tf5 (adziny chod) 5. Fh6+ Kpg8 6. Tg1+ Kpf7 (tut zaciahvała supraciŭ 6…Sg5) 7. Fg6+ i mat. «Typovaja ataka na karala», — ckazaŭ seanser, adnak varyjanty raźbiraŭ doŭha i z pryjemnaściu.
