U subotu (11 žniŭnia) na čempijanacie Eŭropy pa lohkaj atletycy, što prachodzić u švedzkim Hioteborhu, biełarusy zavajavali piać medaloŭ: try załatyja, adzin siarebrany i adzin bronzavy.
U šturchańni jadra siarod žančyn pieršynstvavała Natalla Charaneka. Jejny vynik 19 metraŭ 43 santymetry. Nadzieja Astapčuk, sastupiŭšy joj tolki santymetr (19,42), zavajavała «srebra».
Dva medali na rachunku našych suajčyńnikaŭ u kidańni mołata. Ivan Cichan zavajavaŭ «zołata» z vynikam 81 metar 11 santymetraŭ. U Vadzima Dzieviatoŭskaha — treciaje miesca (80,76). Pamiž biełarusami ukliniŭsia fin Oli-Peki Karjałajnen (80,84). Škada, što nia zdoleŭ prabicca ŭ vaśmiorku najmacniejšych Andrej Varancoŭ, jaki pamyliŭsia va ŭsich troch sprobach.
Piaty medal pryniesła nacyjanalnaj kamandzie Alesia Turava. Jana pieramahła ŭ stypl-čezie (biehu ź pieraškodami), pieraadoleŭšy dystancyju za dzieviać chvilin 26,05 sekundy.
Takim čynam, paśla šaści dzion spabornictvaŭ biełarusy majuć na svaim rachunku siem medaloŭ: čatyry załatyja, dva siarebranyja i adzin bronzavy. Na pačatku tydnia, nahadajem, Andrej Michnievič zavajavaŭ «srebra» u šturchańni jadra, a Ryta Turava — «zołata» ŭ chadzie na 20 km.
Pierad apošnim dniom spabornictvaŭ najbolej medaloŭ majuć rasiejcy: 28 (8 załatych, 11 siarebranych, 9 bronzavych).
Biełarusy zajmajuć druhoje miesca ŭ nieaficyjnym zaliku pa kolkaści załatych medaloŭ i treciaje pa ahulnaj kolkaści ŭznaharod. Tak, zbornaja Niamieččyny maje vosiem medaloŭ, ale ŭ ich tolki try załatyja. Siem medaloŭ na rachunku Hišpanii (2, 3, 2), pa šeść majuć Vialikabrytanija i Švecyja. U Polščy — čatyry medali (0, 2, 2), Ukrainy — 3 (0, 1, 2).
Zaŭtra apošni dzień spabornictvaŭ. Biełaruski, u pryvatnaści, vystupiać u estafetach 4ch100 i 4ch400 metraŭ.
